Welatiyên deverên başûrê herêma Cizîrê daxwaza xizmetguzariyên pêwîst ên wekî kanalîzasyon, ava vexwarinê û paqijiyê dikin. Bi taybet budçeya şaredariyên nû nehatiye veqetandin. Meclisa Rêveber a Komîteya Şaredariyan piştrast kir ku ew ji bo veqetandina budçeya şaredariyên nû di nava hewldanan de ne.
Deverên başûrê navçeya Tirbespiyê bi taybet deverên nû ji destên çeteyên DAIŞ’ê hatine rizgarkirin, ji ber kêmbûna xizmetguzariyên sereke astengiyan dikişînin. Bi armanca vejandina van deveran, piştî hilbijartinên dawîn ên Federaliya Demokratîk a Bakurê Sûriyê li van deveran gelek şaredarî hatin avakirin.
Lê ev şaredariyên nû hatine avakirin hê jî budçeyeke wan a taybet nehatiye veqetandin û di encamê de hê jî nikarin xizmeta welatiyan bikin.
KANALÎZASYON TÊK ÇUNE
Yek ji van şaredariyan Şaredariya Ebû Ferih a başûrê Tirbespiyê ye. Welatiyên bajarok daxwaza kêrhatîkirina şaredariyê dikin da ku pirsgirêkên welatiyan bêne çareserkirin. Welatiyê bi navê Ebas Salih diyar kir ku çeteyên DAIŞ’ê binesaziya bajarok têk biriye û bang li aliyên têkildar kir ku di demeke lezgîn de kanalîzasyonê sererast bikin û xizmetguzariyên sereke yên wekî peydakirina ava vexwarinê pêk bînin.
Endamê Şaredariyê Mehmûd El-Helo destnîşan kir ku wan gelek giliyên welatiyan ên derbarê kanalîzasyonê de wergirtine, bi taybet ji ber ku ji bo tenduristiya giştî ya welatiyên bajarok metirsiyek e.
DIYARKIRINA
BUDÇEYAN
Hevseroka Şaredariya Gel a bajaroka Ebû Ferih, Menal El-Helo destnîşan kir ku budçeya şaredariya wan hê jî nehatiye veqetandin û diyar kir ku ew ji bo baweriya gel wergirin di nava xebatan de ne û bang li Meclisa Şaredariyan a Qamişlo kir ku di demeke lezgîn de budçeya şaredariya wan veqetînin da ku bikarin xizmeta welatiyan bikin.
Endamê Rêveberiya Meclisa Şaredariyan a Qamişlo Mesûd Yûsif piştrast kir ku ji bo veqetandina budçeya van şaredariyên nû hatine avakirin ew di nava hewldanan de ne û wê hemû pêdiviyên sereke ji wan re peyda bikin da ku karibin xizmeta welatiyan bikin û pirsgirêkên van deveran çareser bikin…ANHA
Divê budçeya şaredariyan bê veqetandin
