Fener…
Idrîs Henan
Mehek zêdetir agirê Newrozê şewqa xwe li her derê belav bûye û tarîtiya di quncik û koşeyan têk biriye. Êdî tiştek bin cilê nemaye, Newroza îsal bersiva hemû dudiliyên sergeşt bû. Çeja li Newroza 2024`an zêde bûye, mizgîniya Gerîlayên Azadiyê bû. Lew re, Newrozeke afrîner, xwedawendî û vejîner bû. Bi dehan milyonan Kurd, Kurdistanî û dostên wan li tevayî dunyayê bi ruhê berxwedana Îmraliyê Newroz pîroz kirin. Agirê Kawayê hemdem, Mezlûm Dogan û qêrîna zayîna yekem a Egîdan bi mizgîniya bidestxistina fûzeyên xistina balafirên bêmirov û xistina 15 celebên balafirên bêmirov, geş û bilind bû. Bi wê mizgîniyê re, giyana tolhildêr û berxwedêr mezintir bû. Bi gotinek din; çawa ku berxwedana Mezlûman û Egîdan naveroka têgihaştina şoreşgerî ya Tevgera Azadiyê diteyisîne, Mizgîniya Fermandariya Giştî ya Hêzên Parastina Gel HPG jî, zîrweya wê naverokê ye.
Di demekê de ku tecrîda li Îmraliyê girantir bûye, sîstema îzolekirinê li tevayî beşên jiyanê kengere bûye, dagirkerên Kurdistanê û cehşokên Kurdan li ser têkbirina têkoşîna gelan a azadî û demokrasiyê di nava têkîlî û hevkariyê de ne, berxwedana Kurdan li çar beşên Kurdistanê bi ser dikeve û li tevayî dunyayê belav dibe, mizgîniya Newrozê ya Hefteya Qeheremaniyê hat. Aliyê wê zeman mekan ve, gelek girîng û watedar e ku helwesteke xof û tirsê di dilê dagirkeran de çêdike. Ji ber ku di wexteke wisa de ku dagirkerên Kurdistanê û ezbeniyên wan amadekeriya oparasyonên qirkirinê dikin, ev mizgînî weke hedekî şoreşgerî yê ku hevkariya wan vala derdixîne, derkete holê. Her wiha, aliyê stratejîk a pêvajoya dîrokî ya têkoşîna gelan a ji bo azadî, xilasî û demokrasiyê ve, pêngaveke zanista şoreşgerî ku li dibistana şoreşgerî ya cîhanî de zêde bû. Ango; zanista bi paradîgmaya misogerkirina azadiyê, bi vê mizgîniyê tacîdar dibe û çi rê û rêçikên têkoşîn, berxwedan û vîna xilasiyê hebin, bi cîhana berxwedêr re hate parvekirin.
Mizgîniya Tevgera Azadiyê ya Newroza 2024`an, belansa diyalektîka dualîteyên çêkirî û ferzkirî sererast kir û hemû nelirêtiyên hebûn, tûşî ji nû ve hesabkirin û fikirînê kirin. Yanê; diyalektîka civakî ku dîrok bi zanista gel aniye vê kêliya îro, ji nû ve xistiye meriyetê û li beramberî çêkiriyên modernîteya zor û şîdetê, xuliqkariya xwezayî ya modernîtaya demokratîk a dayîksalariyê vejand. Ji ber vê jî Newroza îsal cudayî hemû Newrozên derbasbûyî ye ku yekem car e, di dirêjahiya dîrokê de, gelê Kurd insiyatîfê ji destê celadên xwe digire û wan dajo koşeya tarî ya wendakirinê. Pratîka artêşa dagirker a faşîzma tirk li çiyayên Herêmên Parastina Medya, wendabûna mijara gotinê isbat dike.
Rûyê dîtir a vê mizgîniyê jî ew e; ku hemû hewldanên faşîzma tirk yên reşkirin û bêbandorkirina Tevgera Azadiya Kurdistanê aliyê siyasî, leşkerî, dîplomasî û civakî ve, badilhewa çûn. Ev mizgînî ne tenê meseleyekî leşkerî ye, meseleyek di eslê xwe de polîtîk e ku serketina senteza azadiya gelan a bi pêşengiya paradîgmaya Rêber Apo pêş ketiye nîşan dike. Ji xwe hembêzkirina navneteweyî ya hemleya; Azadî ji bo Rêber Abdulah Ocalan, Çareseriya demokratîk ji doza Kurd re, wê serkeftinê bê şîrove rave dike. Îroj ev serkeftin di karakterê Newroza îsal de, bi mizgîniya Tevgera Azadiyê re xwe li hemû meydanên siyasî, dîplomasî û leşkerî dide der. Ango; îroj cîhana ku di çirava kaos û aloziyên çêkirine de, vekeviziye, bi mecbûrî berê xwe ber bi Îmraliyê ve ye. Çinku ti rê ji bilî Îmraliyê li ber wan nemaye. Mizgînî jî di wê wateya polîtîk û leşkerî de stratîjk û di wextê de ye ku pêşeroja azad a gelekî hatibû keviyê tunebûnê misoger dike.