Fermandariya YBŞ’ê têkildarî 4’emîn salvegera êrîşên qirkirinê yên li dijî gelê Êzidî daxuyanî da. YBŞ’ê diyar kir ku ji bo Iraqeke federal-demokratîk amadene hemû piştgiriyê bidin.
Fermandariya Yekîneyên Berxwedana Şengalê (YBŞ) têkildarî 4’emîn salvegera êrîşên qirkirinê yên çeteyên DAIŞ’ê ya li dijî gelê Êzidî daxuyaniyeke nivîskî weşand. Fermandariya YBŞ’ê ji bo YJŞ û YBŞ’ê ku di dema berxwedana li dijî DAIŞ’ê de avabû wiha got; “Li Iraqê hêzeke ku xeta demokrasiyê esas digre ye.”
Di daxuyaniyê de ev tişt hate gotin; “YBŞ û YJŞ hêzeke ku di dema fermanê de hatiye avakirin û ji ber vê sedemê di dîrokê de xwedî ciheke girîng e. YBŞ û YJŞ hem ji bo xweseriya Şengalê û hem jî bingehê azadiya Iraqeke demokratîk li xwe digre û ji bo vê armancê tişta pêwîst çibe wê di demê xwe de bike. Gelê Êzidî êdî xwedî wê îrade û hêzêye ku xwe biparêze. Vî gelî qirkirineke ku ji bo dîroka mirovahiyê şermeke mezine jiya û em weke YBŞ û YJŞ ji bo ku carek din ev qirkirin çênebe di xeta fedayiyê de heta dilopa dawiya xwîna xwe li dijî hemû zihniyeta paşverû şer bikin.”
YBŞ’ê bal kişand li ser têkçûna çeteyên DAIŞ’ê ya li Reqa û Mûsilê, li herêmên hatine rizgarkirin hişyarî da ku gefên DAIŞ’ê hê didomin.
Fermandariya YBŞ’ê di dewama daxuyaniyê de wiha got; “Xwepêşandan û serhildanên gel yên li dijî rewşa aborî û nelirêtiyan li Iraqê didomin, di heman demê de gefa DAIŞ’ê ya li herêmê jî didome. Di rewşeke wiha de em amadene heta dawiyê gelê xwe biparêzin. Lı Iraqê tenê rêyek ya rizgariyê heye ew jî xeta demokratîk e. Em weke YBŞ û YJŞ ji bo avakirina Iraqeke federal-demokratîk tişta ji destê me were em ê bikin.”
Em ê heta dawiyê gelê xwe biparêzin
