Hêvî Melek/ Qamişlo
Welatî û firoşkarên bajarê Qamişlo diyar kirin u ji ber buhayê bilind yê kelûpelan her kes di meha Remezanê de zehmetiyan dikşîne û gotin, ji ber têkçûna nirxê lîreya Sûrî û êrişên dewleta Tirk a dagirker piraniya malbatan di milê aborî de zehmetiyên mezin dibînin.
Li tevahiya cîhanê muslman her sal meha Remezanê bi kefxweşî û coşeke mezin pêşwazî dikin, herwiha di vê mehê de rojiyê digrin. Li gorî ola Îslamê meha Remezanê mehekî pîroz e, ji ber ku di vê mehê de Qur’ana pîroz daketiye. Lê li tevahiya Sûriyê û li herêma bakur û rojhilatê Sûriyê welatî di vê mehê de zehmetiyên mezin dibînin, ew jî ji ber rewşa aborî ya xerabe û buhabûna kelûpelan e.
Di derbarê pêşwazîkirina meha remezanê de û buhayên kelûpelên xwarin û vexwarinê firoşkar û
welatiyên bajarê Qamişlo ji rojnameya me re axivîn.
firoşkerê sebzeyan Mustefa Ebdulbaqî diyar kir ku meha Remezana sala par û ya îsal pir ji hev cuda ye û wiha got: “Îsal buhayê sebze û goşt û tevahiya kelûpelan pir bilind bûye. Ji ber wê welatî bi zehmetî rojiya xwe derbas dikin. Kirîna sebzeyan kêm bûye ew jî ji ber buhayê wê yê bilind e. Rewşa Remezana îsal ji sala borî pir cuda ye ew kêfxweşî û amadekariyên ku berê dihatin kirin îsal ew qas nayê kirin. Ji ber bilindbûna nirxê dolar her tişt buha bûye û bazirgan jî dema ku nirxê dolar bilind dibe ew jî buhayê tiştên xwe zêde dikin lê dema ku dadikeve jî lê nirxê wê bilind dihêlin.”
Di heman mijarî de firoşkarê Xurmeyan yê bi navê Mihemed Şepal ku li bazara bajarê Qamişlo kar dike derbarê hazirtiyên meha remezanê wiha got: “Buhayê xurmeyan bi taybet ne bilind e û hemwelatî dikarin bi hêsanî bikirin. Cudahiya di navbera buhayê cureyên sebzeyan û tiştên din de heye mîna
buhayê goşt, sebze û şêranî, lê tiştên ku ji meha Remezanê re pêwîstin buha tên firotin. Sala par jî buhayên tiştan bilind bû lê îsal pir zêde ye û gelek kes nikarin pêdiviyên xwe yê jiyanî pêk werînin. Êrişên dewleta tirk jî roleke pir mezin di vê yekê de dilîze, êrişên dewleta tirk jî bandorê li aboriya civakê dike ji ber êrişên wan li ser binesaziya herêmê hemwelatî bê elektrîk û petrol û gelek tiştên din mane, ji ber vê yekê yên ku gelek zirar gihandiye me dewleta Tirk a dagirker e ku hem bi êrişên xwe hem jî bi dorpêçên xwe gel dike armanc.”
Di heman çarçoveyê de welatiya bi navê Hosa Xilêf da zanîn ku ji ber bihabûna nirxên xwarin û vexwarinê hemwelatî pir astengiyan dikşînin û wiha got: “Piştî daketina nirxên lêreya Sûrî li beramberî dolar, Li bajarê Qamislo buhayên kelûpelên xwarinê û sebzeyan gelek zêde bûne. kesên feqîr nikarin
rojiya xwe bi awayekî baş biqedînin ji ber vê yekê banga me ewe ku hinek ji nirxên xwarin û vexwarinên remezanê dakeve da ku her kes karibe ji xwe re bikire. Ji ber krîza aboriyê ya li Sûriyeyê û ji ber êrişên li herêmê û hilweşîna lîreya Sûriyeyê dabînkirina pêdiviyên Remezanê zehmet in.”