Navenda Nûçeyan
Li gorî daneyên fermî 40 partiyên siyasî ruxset ji Komîteya Kar û Barên Partiyên Siyasî ya Rêveberiya Xweseriya Demokratîk wergertine.
Li herêmên Bakur û Rojhilatê Sûriyê bi dehan tevger û partiyên Kurd, Ereb, Suryan, Asur û Ermenan hene. Hejmara partiyên ku ji aliyê Komîteya Kar û Barên Partiyên Siyasî ya girêdayî Rêveberiya Xweseriya Demokratîk çend in û kijan in?
Komîteya Kar û Barên Partiyên Siyasî ya girêdayî Rêveberiya Xweseriya Demokratîk 7’ê Adarê biryarek derxist. Di biryarê de muhlet heta 1’ê Nîsanê da partiyên siyasî yên li herêmê kar dikin, da ku serî li komîteyê bidin û daxwazanameya ruxsetkirinê bi dest bixin. Herwiha hate diyarkirin ku eger partî neyên ruxsetkirin, dê li dijî wan biryar werin girtin.
Qanûna ruxsetkirina partiyên siyasî ya Rêveberiya Xweseriya Demokratîk di 20’ê Gulana 2018’an hatibû derxistin.
Li gorî daneyên fermî, ji 65 partî û tevgeran, 40 heb hatine ruxsetkirin. Partiyên ruxsetkirî ev in:
Partiya Aştiya Demokratîk a Kurdî, Partiya Lîberal a Kurdistanê, Partiya Demuqrat a Kurd li Sûrî (Partî), Partiya Komunîst a Kurdistanê, Partiya Demokrat a Kurd li Sûriyeyê, Partiya Yekitiya Demokratîk (PYD), Partiya Çep a Demokrat a Kurd li Sûriyê, Partiya Yekitiya Suryan, Partiya Çep a Kurd li Sûriyeyê, Partiya Kombûna Niştimanî ya Kurdistanî, Kongra Star, Partiya Guhertin a Kurdistanê, Partiya Kombûna Demokrat a Sûriyeyê, Partiya Kesk a Demokratîk, Partiya Rêkeftina Demokrat a Kurdî li Sûriyê, Partiya Yekitî, Partiya Biratî ya Kurdistanê (PBK), Partiya Nûjen û Demokratîk, Partiya Nûjen û Demokratîk a Sûriyeyê, Partî Demokratî Kurdistanî, Cebhet Enqaz Sûriye, Partiya Têkoşîna Demokrat, Teyar El Xed El Sûrî (Şepêla Siberojê ya Sûriye), Partiya Roj a Demokratîk li Sûriyê, El Heyeta El Weteniye Litehrîr (Desteya Nîştimanî ya Erebî), Partiya Asûrî ya Demokratîk, Partiya Demokratîk a Muhafezkaran, Yekitiya Kedkaran a Kurdistanê, Heyet El Hensîq El Weteniye- Hereket El Texyîr, Partiya Sûriya Pêşerojê, Şepêla Siberojê ya Kurdistanê, Partiya Demokratîk a Sûriyeyê, Partiya Muhafezkaran a Kurdistanê, Şepêla Sûrî ya Çaksaziyê, Partiya Demokrat a Kurdistanê-Rojavayê Kurdistanê, Partiya Pêşxistin û Guhertina Nîştimanî ya Demokratîk, Partiya Avakar û Pêşxistin a Sûriyeyê, Şepêla Çep a Şoreşger li Sûriyê, Partiya Guhertin û Ronesans a Sûriyeyê, Hevbendiya Niştimanî ya Sûriyeyê.
Beriya demekê Rêveberiya Xweseriya Demokratîk ruxset ji Partiya Yekitiya Nîştimanî ya Azad a Rojava û Partiya Komarî ya Kurdistanê standin.
Rêveberiya Xweseriya Demokratîk di beşa duyemîn a Hevpeymana Civakî de ku 12’ê Kanûna 2023’yan hatibû erêkirin, mafên azadiya derbirîna siyasî misoger dike.