Dilyar Cizîrî
Piştî nêzî 12 salan ji qutkirina têkiliyan Serokê Tirkiyê Receb Teyb Erdogan ji bo rojekê serdana Misrê kir. Serokatiya Tirkiyê bi daxuyaniyekê îda kir ku armanca serdanê pêşxistina têkiliyên herdû welatan û xurtkirina hevkariya wan e. Saziyên ragihandinê yên Misr derbarê serdanê de di nûçeyên xwe de gotin ku serdana bi armanca parvekirina nêrînan derbarê dozên cîhanî û guhertinên piştî şerê Îsraîl û Hemasê ye.
Tişta balkêş piştî Erdogan giha Misrê, Nûçeyek li ser Toreya El-Erebiyê ya Erebistana Siûdiyê hate weşanidn. Li gorî nûçeya xwe dispêre çavkaniyan hate gotin ku dewleta Tirk nasnemaya Tirkiyê ji Berpirsê Karûbarê Tevgera Birayên Misilman li Tirkiyê Mehmûd Hisên ê li Stenbolê rûdinê, kişandiye. Li gorî heman nûçeyê Tirkiyê pesporta Hisên ibtal kiriye û bêyî tu sedeman nîşan bidin, jê re gotine parêzerekî erkdar bike. Li aliyê din jî agahî hene ku pişt serdana Erdogan hejmarek rêveberên Ixwan El-Mislimîn dest pê kirine ji Tirkiyê, derkevin. Ji ber dibe Erdogan ji bo berjewendiyên xwe, wan radestî hikûmeta Misrê bike.
Ji ber ew dizanin li ba Serokê Misrê Ebdulfetah El-Sîsî Rêxistina Ixwan El-Mislimîn xeta sore û bi taybet tevgera wan a xurt li ser xaka Tirkiyê. Di nêrîna min de Erdogan wê bi van rêbazan nikaribe bandorê li Hikûmeta Misrê bike. Bi taybet jî berê Erdogan ji bo têkiliya bi Misrê re hin rêveberên Ixwan dersînor kirin. Di heman demê de navê hin tevgerên girêdayî wan dan guhertin û ji wan xwest hinekî xîtaba xwe ya dijberî hikûmeta Sîsî bidin guhertin. Ev jî nîşaneyeke wê Erdogan di vê dosyê de qezencan bi dest nexe.
Dibe di ragihandinê de behsa dosya Sûriyê û Rêveberiya Xweser di mijarên Erdogan û Sîsî de neyê kirin. Lê wê yek ji mijarên Erdogan ên sereke ew be. Di heman demê de dibe Erdogan ji Sîsî bixwaze li gel Rûsiya danûstendina wan bi hikûmeta Şamê re aktîf bike. Di heman demê de tevgera MSD’ê li Misrê sînordar bike.
Lê heger em vegerin daxuyaniya Serokatiya Tirkiyê ya derbarê serdanê û zimanê ragihandina Misrê diyar dibe, Erdogan tişta ji serdanê hêvî dikir, bi dest ne xistiye. Ew jî girêdayî baldariya hikûmeta Misr a niha û naskirina wan ji niyetên Erdogan ku demekê bi hemû hêza xwe piştgiriya Ixwan El-Mislimîn li Misr kir. Bi hevkariya Tirkiyê jî Mihemed Mursî yê Ixwanî gihişt serokatiya Misrê.
Ev jî sedema sereke a wê yekê ye zû bi zû baweriya hikûmeta Misrê bi hikûmeta Erdogan neyê. Ji ber wê jî wê Sîsî asta daxwazên xwe yên ji Erdogan bilind bike. Mijareke din a serke di navbera herdû aliyan de Şerê di navbera Îsraîl û Hemasê ye. Wê herdû alî di vir de hewl bidin nêrînên xwe nêzî hev nîşan bidin.
Lê di wir de jî her aliyek wê hewl bide ji bo berjewendiyên xwe werîs ber xwe ve bikşîne.Lê di nêrîna min de civaka ereb û bi taybet gelê Filistînê wê bi daxuyaniyên Erdogan nema werin xapandin. Lê di encamê de mirov bi hêsanî dikare bibêje Erdogan wê bi serdana Misrê xwestekên xwe pêk neyne.