Ahmed Aktaş
Dîsa salvegera 25an a roja reş, roja dilêş, roja ku em hemû ji dil û ji derûnî ve birindar kir, hat pêşberî me!
Di wê rojê de, îradeya gelê Kurdistanê dîl hat girtin û 25 sal in di bin pergala êşkencê û tecrîda giran a dewleta qirker a Tirk de ye. Bi vê komploya Rêber APO re, ne tenê derbe li tevgêra gelê Kurdistanê dan, lê armanca vê komployê firehtir e.
Plangerên komployê, xwestin pêşîyê li ber fikir û ramanê Rêber APO bigrin, da ku bandora wê derbasî nava gelên herêmê û cîhanê nebe.
Ji ber ku dewletên serwerên cîhanê, felsefe û pergala Rêber APO, ji bo pergalên xwe alternatîf/berdêl û xeter didîtin.
Lewma li ser vê komplogeriya 15’ê Sibatê, ji DYE, Inglistan û Israliê heta Rûsyayê, Misirê û hwd.dewletên cîhanê bûn hemfikir. (Rola dewleta tirk; “gardiyanî”ye)
Tê dîtin ku çendîn balkêşe! Dewletên duh di şerê cîihanê yê 2mîn de dijminên hev bûn, îro di şerê cîhanê yê 3mîn de dîsa dijberbin jî, lê belê çawa û çima li dijî Rêber APO karibûn bibin hevkar û di vê plangeriya cihanî de, her yek ji wan rolekî hildin ser milên xwe?
Erê dema şîroveyek bi vî awayî tê kirin, hinek zimandirêj û mejî qirêj hene û li dijî vê nêrînê derdikevin.
Lê ma ev komplo, ji roja despêkê ya 10’ê Cotmeha 1998an û li pey wê roja 15’ê Sibata 1999an, heta îro hemû li ber çavê raya giştî pêknehat?
Dibe ku di hûrgiliyan de kêmayî hebin lê zêdeyî nîne. Erê serkêşiya vê plangeriyê, DYEyê û hinek dewletên hevalbendên wê kirin, lê keryek dewletên din ên cîhanê, ji Ewrupayê, Asyayê û heta Efriqayê beşdarî vê komployê bûn. Gotin hebû ku hinek hêviya dostayê ji Rûsya û Yewnanistanê dihat, lê berovajî, rola herî qirêj jî van dewletan list in! Di vê komployê de, ji ti dewletan piştgrî nehat, tenê ji Hafiz Esed û Massimo D’Alema hinek bêhna dostayiyê hat û weselam!
Di encamê de mirov bala xwe bide realitê, her alî ji bo berjewendên xwe, li goreyî zihniyeta xwe rolên xwe lîstin. Di komployê de, mijara herî giring û bingehîn, rola Rêber APO ye ku bi hostayiyek mezin û berxwedanek demdirêj, mirazê komplogeran di qirika wan de hişt û plangeriya wan pûç kir. Herwiha, paralelî berxwedana Rêber APO ya Imraliyê, xwediderketina bi hijmarek mezin a canbexşane(ku li cîhanê mînaka wê nîne) û lehengî ya şopdarên Wî; heval û hogirên wî yên Tevgerê, gelê Kurdistanê yê welatparêz û dostên wan, bandora hêza felsefe û tevgera Rêber APO, ji raya giştî ya cîhanê re nîşan dan.
Xwedîderketina Rêber APO û paradigma wî, îsal gihiştiye asta herî bilind; him li qada netewî him jî li qada navneteweyî, êdî ji bo yekser azadiya wî û çareseriya pirsgrêka kurd, kampanyayên berfireh ên demdirêj hatin despêkirin. Kurt kurmancî, ew çeka wan a komplogeran li wan zivirî; gelê Kurdistanê û dostên xwe, bê tirs û bicesaret hîn pêhtir li dor Rêber APO civiyan û dicivin.
Bêguman Azadbûna Rêber APO û serkeftina giştî nêztir dibe!