Nehîr Pale
Sumeriyan sala 3500 BZ. jin li perestgehên xwe kirin kole, ew ji siyasetê dûrxistin, di rêvebirina civakê de rol jê standin û ew ji bo berjewendiyên xwe dan bi kar anîn. Zîhniyeta Sûmeriyan heyanî roja îro berdewam dike. Dewletên navdewletî jî îro heman rêbazî li hemberî jinê didin bi kar anîn û kampa Holê ji bo jinên DAIŞ`ê kirine stargeh.
Jinên çeteyên DAIŞ`ê li kampa Holê neslekî herî xeter mezin dikin. Ew jin hemû hemwelatiyên dewletên derveyî Sûrî ne, zagonî ji Rêveberiya Xweser nayê xwestin ku berpirsyartiya wan rabike. Lê ev zêdetirî 5 sale ku ew jin li kampa Holê ne û xwe birêxistin dikin.
Li kampa Holê li ser destê jinên çeteyên DAIŞ`ê buyerên gelekî giran qewimîn. Jinên ku li ser gotinên wan nemeşîn ew bi rêbazên gelekî qirêj qetil kirin, xendekan dikolin, çek vedişêrin, çete dihewînin û diparêzin. Tişta balkêş ew e ku her diçe hejmara zarokên wan zêde dibin. Ew jinên çeteyên DAIŞ`ê wan zarokan li ser kêr û amûrên tûj fêrî dijminayî û kuştinê dikin. Eger QSD û hêzên ewlekariya hindirîn di mijara ewlehiyê de tedbîr negrin ew jinên DAIŞ`ê wê kampa Holê bikin navenda çeteyên DAIŞ`ê.
Zîhniyeta DAIŞ`ê li ser xebatên jin xeteriyeke mezin e. Ew jinên ku zîhniyeta wan a DAIŞ`e û dikevin nava civakê de wê bandoreke neyînî li ser civakê bikin. Jinên DAIŞ`ê wê her tim hewl bidin ku derbe li têkoşîna jin bidin.
Piştî sala 2014`an çeteyên DAIŞ`ê gund û bajarên Sûriyeyê dagirkirin, ji aliyê zîhnî ve gelekî bandorekî neyînî li ser civakê kir. Hemleya xwe ya dagirkirinê di bin navê ol de kirin, jin li bazarên El-Nexase firotin, ew weke cariye dan bi kar anîn, destdirêjî li wan kirin û jinên ku piçekî canê wan xuyakiribane ew işkence dikirin, êdî her tiştê jinê guneh û şerm bû. Di bin navê jinê zîne kiriye ew bi destê mêran recm dikirin. Çeteyên DAIŞ`ê kiryarên herî qirêj li ser jinê dan meşandin û jin anîn rewşa ku qet ji malên xwe dernekevin.
Li kampa Holê niha jinên çeteyên DAIŞ`ê heman rêbazan li hemberî jinan didin meşandin. Bi dehan jin kuştin û zîhniyeta çeteyên DAIŞ`ê li ser civakê û jinê ferz dikin.
Di hemleya Mirovî û Ewlehî ya ku hêzên ewlekariyê û leşkerî 27`ê Çile dest pê kiribûn gelek hucreyên veşartî yên çeteyên DAIŞ`ê li ciyê jinên DAIŞ`î hatin girtin. Ji bo hemle neyê kirin zarok û jinên DAIŞ`ê êrîş dikirin. Hêzên leşkerî ev bûye zêdetirî 9 rojan dest bi hemlê kirine û her roj cebilxane li kampa Holê tê girtin.
Jinên çeteyên DAIŞ`ê yên ku li kampa Holê dimînin wê her tim li ser herêma Bakur û Rojhilatê Sûriyeyê xeter bin. Ji aliyê zîhnî û exlaqî ve bi civakê dileyîzin û neslekî ku zîhniyeta DAIŞ’ê dayimî bike mezin dikin. Dewletên Ewrûpa berpirsyartiya van jin û girtiyên DAIŞ`ê ranakin û mîna dewleta Tirk a dagirker her tim hewl didin ku bi riya çeteyên DAIŞ`ê êrîşî herêma Bakur û Rojhilatê Sûriyeyê bikin. Dewletên dagirker di pêvajoyên pêş me de wê van jinên DAIŞ`ê ji bo berjewendiyên xwe bidin bi kar anîn.
