Farûk Sakik
25’ê Çileyê HPG’ê bi daxuyaniyek digot; “Em dikarin bi belgeyan îspat bikin ku PDK’ê li Herêmên Parastinê yên Medyayê rê ji Artêşa Tirk re çêdike, wan diparêze û bi hevkariya wan Kurdistan tê dagirkirin. Çekdarên PDK’ê di nava 4 salan de, 4 caran kemîn danîn pêşiya gerîlayên azadiyê û 12 gerîla şehîd xistin.”
Ev çekdarên PDK’ê kî ne? Ev çekdar, di 3’yê Tebaxa 2014’an de dema ku DAIŞ’ê êrişî Şengal kir, civaka Êzidî bi hovîtiya DAIŞ’ê re li herêmê hiştin û çûn.
Civaka Kurd her çiqas ew dîmen bi çavên xwe jî dîtin, lê qebûl nekirin ku Pêşmergeyê li dijî dagirkerî û zilma Sedam Husên ewqas şer kiriye tewanbar bike. Dizanîbûn ku li navenda Hewlêrê bi biryareke siyasî ew hatine birêxistinkirin. Ew wesaîtên ku Pêşmerge bi dîmeneke nexweş lê siwar dibûn, ji Hewlêrê bi rê ketibûn.
Ew wesaîtên ku ji Şengalê Pêşmerge revandin, di 24’ê Çileya 2024’an de çekdarên PDK’ê derbasî Herêmên Parastinê yên Medyayê kirin. Li vê derê piştgirî dane dagirkeriya dewleta Tirk. Li vê herêmê kiryarên ku hêzên artêşa Tirk nikaribûn wan pêk anîn.
PDK’a Hewlêrê, dizanibû gerîla qedr û qîmeteke mezin dide Pêşmerge û berê lûleya tifinga xwe tu carî nade Pêşmerge û wan nake armanca xwe. Tevgera Azadiyê, li Pêşmergeyên civaka Êzidî bi DAIŞ’ê re rû bi rû hiştibûn jî xwedî derdiket û parast. Hewldanên wan ên ku civak van Pêşmergeyan û hêz-siyaseta PDK’ê ji hev cuda binirxînin jî hebûn.
28’ê Çileya 2024’an de di Stêrk Tv de di bernameya Ewroj de Hevserokê PYD’ê Salih Muslim mêvan bû. Digot; di pêvajoya berxwedana Kobanê de, me xwest ku komek Pêşmerge werin tevlî berxwedana Kobanê bibin (di rojên dawî yên rizgarkirina Kobanê de). Ji bo ku îmaj û rûmeta wan a li Şengalê binketî ji nû de paqij bikin me ev bang kir. Salih Muslim, dubare dikir û digot; em dizanin ên ji Şengalê bazdan siyaseta PDK’ê bû, Pêşmerge nebû.
Niha wa dîsa ew hêz dîsa di nav liv û tevgerê de ne. Êdî civaka Kurdan nikare wan bide sekinandin. Êdî naxwazin enerjiya xwe bi sekinandina PDK’ê heba bikin. Kurd vegeriyan bê wan (PDK) li rê û rêbazên têkoşînê yên nû digerin.
Di van rojan de tevgerek an jî çalakiyek bi navê RABE dest pê kir. Li gelek deveran nivîsa RABE hat nivîsandin. Li her deverên Kurdistan bi tevlîbûneke roj bi roj mezin û belav dibe. Ev çalaki jî mirov dikare wek parçeyek hamleya ji bo azadiya Rêber Apo hatî destpêkirin jî îzah bike.
Dema ku min çalakiya RABE dît, nivîsa Apê Mûsa ya di rojnameya Welat de a bi sernivîsa ‘Kurdno Rabin’ hat bîra min. Piştî şehadeta wî rojnameya Welat ev derxist manşetê. Kurdan wesyeta wî bi cîh anîn û rabûn serhildananê.
Îroj, di nav civaka Kurdan de westanek dîrokî heye. Yan jî westandinek bi têkoşîna salan re wek ewrek li ser civakê belav bûye, heye. Kurd ji bo da ku vî ewrî berteref bikin û ji nû de vegerin kodên xwe yên têkoşînê yên bere, ji hev re dibêjin ‘rabe’.
Em dîsa vegerin PDK’ê. Ka em ê ji qatilê 12 gerîlayan re bibêjin çi? Her gotin hatiye gotin. Lê mixabin, israra wan a xiyanetê dewam dike. Dîsa jî herî dawî em vê yeke bibêjin; “PDK; Ranebe, li cîhê xwe de rûnê.