Rûheyv Şah/Qamişlo
Yerwant Mosîs ku ji bajarê Qamişlo ye ji sala 1972’an de û heta niha karê çêkirin û sazkirina kilîtan li bajêr dike, herwiha ew kevntirîn sazker û çêkerê kilîtan li bajarê Qamişlo ye.
Gelek kes hene ku ji temenekî biçûk de fêrê çêkirin û sazkirina hin amûran dibin, herwiha pêşeya xwe bi 10 salan didin meşandin û derbasî nifşên nû dikin.
Yek ji wan kesên ku di warê çêkirin û sazkirina kilîtan de xwedî tecrubeyeke dûr û dirêje;Yerwant Mosîs e ku ji beriya 52 salan ve û heta niha karê çêkirina kilîtan bê rawestandin didomîn e.
Derbarê kar û serpêhatiyên xwe de, Yerwant Mosîs ku kevntirîn çêkerê kilîtan li bajarê Qamişlo ye, ji rojnameya me re axivî.
Yerwant Mosîs diyar kir ku ew di sala 1947`an de li bajarê Qamişlo ji dayik bûye û wiha got: “Di sala 1972`yan de min dest bi karê çêkirin û sazkirina kilîtan kiriye û heya niha jî karê min berdewame. Min 52 sal ji temenê bê rawestandin di çêkirina kilîtan de derbas kiriye. Ez pir ji karê xwe hez dikim û bi riya karê xwe debara jiyana xe û malbata xwe dikim.”
‘Bilindbûna nirxê dolar ziyanek mezin gihand karê min’
Yerwant Mosîs da zanîn ku dikana wî ya herî kevnar di bazara Qamişlo de ye û axaftina xwe wiha qedand: “Beriya Kirîza Sûriyê karê me baştir bû, lê ji ber bilindbûna nirxê dolar asta kar pir lawaz bûye. Tevî ku dikanan min ya herî kevnar di bazara Qamişlo de ye, lê dîsa tevgera welatiyan pir kêm bûye. Zerar ne tenê li min hatiye lê belê li hemî gelên vê herêmê hatiye kirin,di heman demê de em amûrên xwe yê çeksazkirinê dema ku dikerin piştî demekê buhayê wê pir zêde dibe tu sûd jê nayê girtin. Min ciwaniya temenê xwe di karê çêkirina miftyan û tamîrkirina wan de derbas kiriye, min di 25 saliya xwe de ev dikan da avakirin û min dest bi karê kilîtan kir, vekirina vê dikanê jî ku daxwaza min bû ji berê de û anha bûye 52 salê min ku ez vî karî dikim , ez tê de rehetim ji ber ku ez ji karê xwe pir hezdikm, û di heman demê de ez têde serkeftî me. Çêkirina mifteyeke biçûk dikare roja min bi kêfxweşîyeke pir mezin derbas bike.”