Ahmet Aktaş
Dewleta faşîst a Tirk, êdî ti sînoran nasnake, êrîşî her qadê jiyanê dike.
Ti rûmetên mirovahî nasnake û ne rûmetên mirovahiyê tenê, êdî êrîşî hemû xwezaya Kurdistanê dike.
Ji bo vê politîka xwe ya qirêj û qirker bi ser bixe, her cûre çekan; ji yên takekesi heta yên kîmyewî û yên taktik nuklerî li Kurdistanê dide xebitandin.
Hilbet ji bo bi lez û bi bingehîn bibe xwedî serketinek demdirêj, armancên xwe yên sereke rêz kiririye.
Bêgûman ji fîlozof û rêşanê gelê Kurdistanê Rêber Apo despê dike, hema li pey wî şopdarên wî rêveberên Tevgêra Azadiyê dixe rêzê û êdî yek bi yek çalakvanên şoreşê; ji alîgirên Tevgêrê heta endam û dilxwazên siyaseta fermî Partiya DEM û hemû rêxistinên yasayî yên sivîl dixin ber êrîşên xwe.
Êdî aşkere diyer e ku vê dewleta dîktator a Tirk, di pêşengiya koma kujerên mîna Receb Erdogan û Devlet Bahçelî de, êrîşên xwe yên qirkeriya ser Kurdistanê gihandine radeya Seferberiyek Giştî.
Bû sê sal ku agahî ji Rêber Apo û her sê hevalên wî yên li zindana Imraliyê ne, nayên standin.
Bi deh hezaran rêber û endamên tevgêr û rêxistinên sivîl û demokratîk ên gelê Kurdistanê hatine girtin û di zîndanan de ne, li ser wan hemû kiryarên xerab ên êşkencewarî tên meşandin.
Dibe ku mijara herî xerabkar û gelê Kurdistanê hêrs dike jî hevkariya Berzaniyên li gel dewleta qirker a tirk e.
Hilbet li himber van êrîşên xedar û berfireh, bi giştî Tevgêra Azadiya Gelê Kurdistanê û gelê welatparêzê Kurdistanê jî, bêdeng û bêtevgêr nema ne û namîne.
Li her çar parçeyên Kurdistanê û bi giştî li her deverê cîhanê, li dijî êrîşkariya dewleta faşist a tirk, gelê Kurdistanê bi tevgêr hilwesta xwe nîşandide û her wiha him li Rêberê xwe û him li Tevgêra xwe, bênavber xwedî derdikeve.
Di nava şerd û mercên ewqas dijwar de, li Bakur xebatek hêja ya hilbijartinên xwecihî/herêmî ya şaredariyan, bêtirs bi wêrehî/bi cesaret tên birêvebirin.
Li gel sîstema hevserokatiyê, vê carê hilbijartinên pêşwext jî hat birêvebirin û ev şêwazê nuh ê hilbijartinê, ji aliyê gel ve pir bi rûmet hat pêşewazîkirin û di raya giştî ya cîhanê de jî weke demokrasiya yekser a gel dengveda.
Di vê qonaxa nû de, divê li gel operasyonên nûjen ên gerila û Tevgêra Azadiyê, hemû gelê me yên welatparêzên dilşewat, di asta bilind de, çawa pêşkêşî ji şoreşê û doza azadiyê re kirin, dîsa her li rêza pêş cih bigrin û têbikoşîn.
Her wiha, divê dostên gelê Kurdistanê, hemû kesên demokrat, mafparêzên mirovan û rayagiştî ya cîhanê, guhên xwe li deng û banga gerîlla û gelê Kurdistanê vekin, êdî dawiyê li xemsariya xwe bînin û êdî li rex têkoşîna doza Kurdistanê bi xurtî cih bigrin!
Êdî, divê li dijî van êrîşên giştî yên her alî yên dewleta tirk û xiyanetê, em jî bi ruhekî serhildana giştî rabin ser piya, da ku em karibin zûtirîn wext Rêberên xwe, gelên xwe û mirovahiyê, ji vê zulmê û zîndanan rizgar bikin û jiyana azad û aram biafirînin.