Ayşa Silêman/ Qamişlo
Hevseroka Desteya Aborî ya kantona Cizîrê Hediya Elî diyar kir ku armanca êrişên dewleta Tirk a dagirker dagirkirina tevahiya xaka bakur û rojhilatê Suriyê ye û got, dagirkerî dixwaze bi riya hedefgirtina aboriya civakê gel qir bike.
Ji bo têkbirina vîna gelên herêmê, herwiha pêkanîna projeya dagirkirina xaka Sûriyê , dewleta Tirk a degirker bi tevahiya hêza êrişî gelên herêmê dike. Di van êrişan binesaziya herêmê bi awayekî rasterast dibe armanc, herwiha bi 100 hezaran gelên herêmê ji xizmetguzariya pêwîst bê par dimînin.Tevî ku dagirkeriya Tirk bi êrişên xwe yên ser binesaziya herêmê sûcên dijmirovî dike, lê tevahiya cîhan çavê xwe ji van êrişan digre û dibe hevkarê dagirkeriyê. Li aliyekî din jî, gelê herêmê her çiqas êriş zêde dibin, ew jî berxwedaniyê xurtir dikin û bi biryardariyeke mezin girêdana xwe bi axa xwe re tekez dikin.
Derbarê êrişên dewleta Tirk a dagirker yên li ser binesaziya Herêma bakur û rojhilatê Sûriyê hevseroka Desteya Aborî ya kantona Cizîrê Hediya Elî ji Rojnameya me re axivî.
‘Hedefgirtina binesaziya Herêmê sûcekî dijmirovî ye’
Hediya Elî diyar kir ku dewleta Tirk a dagirker hertim bi êrîşên xwe yên domdar binesaziya herêmê dike armanc û wiha got: “Dewleta Tirk a dagirker dixwaze îradeya gel bişkîne.Dewleta Tirk dixwaze vê yekê bide kirin ku milet koçber bibe û li dijî pirojeya Neteweya Demokrat derkevin, her wiha dixwaze ji milet re bide xuyanî kirin ku ew bitenê dikare li wan xwedî derkeve û vê sîstema Neteweya Demokratî bişkîne, di felsefeya Netewa demokratîk de sîstema Rêveberiya Xweser heye, ya ku ev çend salên wêye Sîstemeke demokratîke dide meşandin.”
‘Ji bo qirkirina gel aboriya civakê dike armanc’
Hevseroka Desteya Aborî ya kantona Cizîrê Hediya Elî di dawiya axaftinên xwe de wiha got: “Dewleta Tirk nahêle gelên Rojava di qada aborî de bi hêza xwe ya xwecihî bijîn, da ku hewcedarî derdorê nebin, herdem pêwîstiyên gel di hundirê herême de peyda bibin, lê dagirkeriya Tirk vê yekê qebûl nake, tevî vê yekê jî Rêveberiya Xweser xebat kare û hewildide vê pirsgirêkê çareser bike, diheman demê de ev herêm pêşbikeve û gel bikaribin jiyaneke wekhev bijîn. Ji ber ku ev êrîş herdem berdewamin koçberî jî zêde dibe, herwiha sekna dewletên dagirker li pêşiya pirojeya Demokratîk ev yek dihêle pirsgirêkên siyasî zêde bibe, heger pisgirêkên siyasî çareser nebin wê pirsgirêka aborî jî berdewam bibe, ji ber ku aboriya Civakê siyaseta civakê diyar dike. Bangewaziya me ji bo hemû Desteyên Mafên Mirovan û Saziyên Navneteweyî ku destekê bidin sîstema Netewa Demokratîk, ji ber ku ev sîstem wê bibe mînak ji bo tevahî Sûriyê re, wê pirsgirêka Sûriyê jî çareser jî bibe bi riya pirojeya Netewa Demokratîk, her wiha Hevpeymana Civakî jî wê di vê salê de pêk werê, bi riya vê Hevpeymanê wê milet bi xwe karîbe xwebirêve bibin, daxwaza min ew e hemû saziyên Nanetewî bêdeng nemînin ji bo van êrîşan û li hember Dewleta Tirk bisekinin û kurd jî bigihin serxwebûna xwe.”
