Dilyar Cizîrî
Rêveberiya Xweser a Bakur û Rojhilatê Sûriyê di dawiya sala 2023’an de Hevpyemana Civakî ya ji 134 madeyan erê kir û di roja erêkirinê de hate piratîzekirin. Di hevpeymanê de erk û mafê hemû gelan bi awayekî rêk û pêk hatiye destnîşan kirin. Di heman demê de rêbaza parastina hevpeyamana civakî hatiye destnîşan kirin. Li gorî wê jî mafê hemû pêkhate û mezheban hate parastin. Di heman demê de Meclîsa Sûriyaya Demokratîk (MSD) kongreya xwe lidar xist û xalên giring derbarê çareseriya aloziya tevahî Sûriyê de destnîşan kirin.
Balkêş bû piştî erêkirina hevpemana Civakî ya Herêma Bakur û Rojhilatê Sûriyê û lidarxistina Kongreya MSD’ê êrişên pir alî hatin ser herêmê. Dewleta Tirk ji aliyê xwe ve dest bi êrişan kir. Bi balafirên bê mirov binesaziya herêmê û hemû cihên jiyana gel eleqedar dike wekî aş, stasyonên neft, xaz, av û eltrîkê bi dijwarî topbaran û bombebaran kirin.
Di encamê de zêdeyî deh welatiyên di wan saziyan de dixebitîn şehîd û birîndar bûn. Di heman demê de zirarekî gelekî mezin a madî di herêmê de çêbû. Heta Nexweşxane, kargehên taybet û cihên jiyana gel eleqedar dike, hatin topbaran û bombebarankirin.
Di heman demê de li ser saziyên ragihandinê êrşên cûrbecûr li dijî Rêveberiya Xweser û MSD’ê hatin. Careke din xwestin ji tevahî Civaka Sûriyê re destnîşan bikin ku Rêveberiya Xweser bi armanca parçekirina xaka Sûriyê ev peymana civakî ya nû destnîşan kiriye. Di heman demê de êrişên ne normal di aliyê ragihandinê de li dijî MSD’ê û xebatên wê hatin avêtin. Hikûmeta Şamê, dewleta Tirk û çeteyên DAIŞ û komên din ên girêdayî herdû aliyan bi yek destî dest bi hemleya reşkirina Rêveberiya Xweser kirin.
Êrişeke mezin a piralî li ser herêmê dan meşandin, lê li hemberî hêza gelên Bakur û Rohilatê Sûriyê hemû planên wan vala derketin. Civaka Bakur û Rojhilatê Sûriyê li beranberî van êrişan ji her demê zêdetir xwedî li destkeftiyên xwe derketin û dest ji rêveberî û hêza xwe ya civakî bernedan.
Gelên Bakur û Rohilatê Sûriyê di serî de di merasîmên Şehîdan, di meş, xwepêşandan û hemû çalakiyên lidar xistin de israra xwe ya serkeftinê hîn zêdetir destnîşan kirin û diyar kirin ew ê xebatên ji bo pêşketin û di zûtirîn dem de piratîzekirina hevpeyamana civakî pêkbînin.
Ên herî zêde jî rola xwedîderketina li hevpeymana civakî û ji bo parastina destkeftiyan gav avêtin, malbatênn şehîdên êrişên dawî bûn. Me dî çawa kurên şehîdan darbesta bavê xwe bi serbilindî rakirin, dayîk û bavên şehîdan nîşana serkeftinê bi serbilindî beriz dikirin. Ew helwesta malbatên şehîdan beşek ji berxwedan û tekoşîna civaka Bakur û Rohilatê Sûriyê bû.
Ji ber wê jî em bi hêsanî dikarin bêjin Dewleta Tirk û şefê wê Erdogan çiqasî êrişî gelên bi rihê berxwedana biratiya gelan û jiyana hevbeş li ser esasê piradîgma Netewa Demokratîk xwe birêxistin kirine, ew ê nikaribin pirojeya demokratîk a bi tekoşîna zêdeyî deh salan hatiye avakirin, ji holê rakin. Ji ber wê jî em ji hemû êrişkaran re dibêjin, çiqasî hûn êrişî bikin, hûnê nikaribin hevpeyamana Civakî ya demokratîk asteng bikin.