Ayşa Silêman/Qamşlo
Desteya Çandî ya Kantona Cizîrê û bi tevlîbûna 13 sazî û yekîtiyên çandî, hunerî, wêjeyî û olî bi daxuyaniyekê êrîşên dewleta Tirk a dagirker yên li ser herêma Bakur û Rojhilatê Sûriyê şermezar kirin.
Desteya Çandê ya Herêma Cizîrê, sazî û yekîtiyên çandî, hunerî, wêjeyî û olî bi daxuyaniyekê êrişên dewleta Tirk a dagirker yên li ser herêma Bakur û Rojhilatê Sûriyê şermezar kirin. Daxuyaniyî seat di 10’an de li li Baxçeyê Xwendinê yê bajarê Qamişloyê hat dayîn.
Herwiha daxuyanî bi zimanê kurdî û erebî bû û ji aliyê hevseroka Desteya Çandê ya kantona Cizîrê Firyal Çolî û endamê Dîwana Wêjeyê Aram Elî ve hat xwendin.
Di destpêka daxuuaniyê de bal hat kişand li ser êrîşên dewleta Tirk a degirker û hedefgirtina gelên bakur û rojhilatê Sûriyê û binesaziya wê û wiha hat gotin:“ Bajar û bajarokên Bakur û Rojhilatê Sûriyê rastî êrîşên hovane yên Tirkiyeyê tên. Di van êrîşan de kesên sivîl, binesazî û avaniyên xizmetkariyê yên weke navendên tovên çandiniyê, stasyonên elektirîkê, bîrên petrol û gazê û malên sivîlan têne armanckirin. Di êvara şahiyên zayîna pêxemberê aştiyê de ev êrîş pêk tên. Dewleta Tirkiyeyê bêyî ku guh bide zengilên dêran û velorînkên aştîxwaziyê her derê dike armanc. Di encama bombebarankirina hovane de bi dehan kesên sivîl jiyana xwe ji dest dane û bi sedan zarok, jin, kal û pîr birîndar bûne. Dewleta Tirk derdora zindana E`laya ya ku çeteyên DAIŞ’ê tê de ne armanc girt, da ku dîwarên zindanê ji çeteyan re veke û ewlehî û aştiya sivîlan bikeve bin gef û metirsiyê. Çeteyên DAIŞ’ê, girêdayî pergala Erdoganê terorîst ku dixwaze herêmê bixe bin gefa vegera van çeteyan. Dewleta Tirkiyeyê hincetan peyda dike da ku dijminahiya xwe ya bi gelên herêmê re berdewam bike. Ji dagirkirina Cerabulsê ya di tebaxa 2016`an de, heta bigihêje dagirkirina Efrînê ya di 2018`an de û dagirkirina Serêkaniyê û Girêspî ya di 2019`an de, gef û dijminahiyên Tirkiyeyê ranewestiyane. Berpirsyar û rayedarên vê pergala faşîst bi awayekî aşkere, dijminahiya xwe ya li dijî hemû pêkhateyên herêmê, di hemû helkeftinan de didin xuyakirin. ”
Di daxuyaniya de hat destnîşankirin ku dagirkeriya Tirk bi êrîş û gefên xwe dixwaze herêmê ji şêniyan vala bike û siyaseta guhertina demografiyê li ser herêmê pêk bîne û wiha hate berdewam kirin: “ Tirkiyeya faşîst dijminahiya gelên hêrêmê dike û êrîşan dibe ser sivîlên destvala. Ev, sûcekî li dijî mirovahiyê ye û ev terora dewletê ye ku dûrî hemû nirxên mirovahiyê û zagonên cîhanî ye. Di encama van sûcan de şêniyên herêmê, ji cihên xwe bi zorê têne koçberkirin. Pergala faşîst hewl dide herêmê ji şêniyan vala bike û siyaseta guhertina demografiyê li ser herêmê pêk bîne. Ev êrîşên hovane him berdewamiya êrîşên qirkirinê ne him jî bersiveke faşîst a li dijî Konferansa Çaremîn a MSD’yê û ragihandina Hevpeymana Civakî ya nû ne. Lê em dizanin ku ev heypeyman, ji bo hemû gelên Sûriyeyê serkeftinek e; nexşerêya çareserkirina qeyrana Sûriyê ye. Û ev hevpeyman, xizmeta planên siyaseta Tûranî ya Tirkiyeyê û armancên wê yên li dijî ji Dêrikê heta Siwêdayê vîna gelên Sûriyeyê nake. ”
Di dawiya daxuyaniyê de sazî, yekîtiyên wêjeyî, civakî û olî wiha bang li rêxistin û sazîyên navneteweyî yên mafên mirovan kirin: “Em van êrîş û gefên Tirkiyeya dagirker yên li ser herêma Bakur û Rojhilatê Sûriyeyê bi tundî şermezar dikin û em bang li aliyên navneteweyî yên dabînker û civaka navnetewî dikin ku di derbarê van êrîş û gefên dubarekirî yên li ser herêma Bakur û Rojhilatê Sûriyeyê de helwesta pêwîst nîşan bidin û bi erk û berpirsyarên xwe ve rabin, destwerdanê bikin û dijminahiya hovane a li ser herêm û bajarokên Bakur û Rojhilatê Sûriyeyê rawestînin û sivîlan ji terora domdar a Tirkiyeyê rizgar bikin. Em dengê xwe digihînin hemû rêxistinên girêdayî mafên mirovan, hemû aştîxwaz, hemû hêzên demokrasiyê û hemû rojnamevanan ji bo ku ev dijminahiya ketûber û hovane raweste, bi erkên xwe rabin û van êrîşan şermezar bikin. Wê aştî, ewlehî û jiyana azad li gel têkoşîna giştî, bi vê yekê pêk were.”