Reşo Mihemed/ Qamişlo
Derbarê dorpêça hikumeta Şamê ya li ser Şehba û taxên Şêxmeqsûdê û Eşrefiyê yên Helebê, Kombenda Efrîn a Civakî li pêş navenda xwe ya bajarê Qamişlo daxuyaniyek da û siyaseta dorpêçê bi tundî şermezar kir.
Îro bi armanca şermezarkirina dorpêça li ser herêma Şehba û taxa Şêxmeqsûdê ya ku ji aliyê hikumeta Şamê ve tê meşandin, Kombenda Efrîn a Civakî daxuyaniyek da.
Daxuyanî li pêşiya Navenda Kombenda Efrîn a Civakî ya li bajarê Qamişlo û bi tevlîbûna hemû endamên kombendê hat xwendin.
Di destpêka daxuuaniyê de bal hat kişand ser dagirkina Efrîn û rewşa koçberên ku li Şehbayê dimînin û wiha hat gotin: “ Zêdetirî 5 sal di ser dagîrkirina Efrînê re derbas bûne û dagirkeriya Tirk bi awayekî domdar kiryarên binpêkirinê li ser gelê Efrînê dide meşandin. Gelê Efrînê yên ku bi darê zorê koçberî herêmên Şehbayê bûne û di kampan de yan jî di malên nîvwêrankirî de dijîn, di salên şer de û di şert û mercên giran de û pêdiviyên herî bingehîn ên jiyanê yên kêm rastî êrişa jî hatin. ”
Herwiha daxuyanî wiha hat domandin: “Hikûmeta Şamê bi awayekî sîstematîk dorpêçeke zor li ser wan xelkên Efrînê ku li Şehba û Şêxmeqsûd bi cih bûne, feriz dike. Armanca vê hikumetê ew e ku îradeya wan bişkîne û wan bi rêya ‘Firqeya Çaran’ belav bike û rê li ber ketina madeyên bingehîn ên wekî derman, ard û madeyên xwarinê bi taybetî sotemenî digire. Bi vî awayî damar û jêderên jiyanê qut dike û êşekê li ser êşeke din zêde dike li ser koçberan. li Heleb û Şehbayê di çar rojên dawî de jenerator bi temamî ji ber nebûna sotemeniyê ji kar derketine, ev jî li gel berdewamiya bombebarankirina sivîlan û hedefgirtina wan ji aliyê dewleta Tirk a dagirker ve hat kirin. Rêveberiya Perwerdeyê ya Şehbayê jî ji ber nebûna mazotê ya germkirinê û rawestandina erebeyan dibistan girtin. ”
Kombenda Efrîn a Civakî derbarê xeteriya dorpêça li ser Şehba û taxên Şêxmeqsûd û Eşrefiyê yên Helebê wiha got: “ Ger dorpêç berdewam bike, dê karesateke mirovî ya din rû bide, ji ber ku jeneratorên nexweşxaneyan dabîn dikin wê rawestin û wê metirsiyê li ser jiyana nexweşan jî çêbike, bi taybet nexweşxaneya Avrîn ya ku xizmeta van koçberên dike, bike. Ji ber vê yekê, me di Komeleya Civakî ya Efrînê de piştgirî û hevgirtina xwe bi gelê xwe yê Şehbayê re bilind kir û em bang li rêxistinên navdewletî û mirovî dikin ku demildest destwerdanê ji bo rakirina dorpêçê bikin. Herwiha da ku karesetele mirûvî çênebe û heta çareseriya siyasî ya ji bo vegera gelê Efrînê bi awayekî aştiyane were jî pêwîste piştgirî, vî gelê ku bi darê zorê ji warê xwe hat derxistin were kirin.”