Sêyemîn dewreya derçûna xwendekarên peymangeha Şehîd Viyan Amara li herêma Şehbayê bi rîve çû û 63’ê xwendekarên Efrînê bi Şahiyekê bawernameyên xwe wergirtin. Xwendekarên peymangehê diyar kirin ku wê bi hezkirin û bawerî bibin perwerdekarên nifşên nû.
Zana Roj/ Şehba
Xebatê Perwerdeyê li herêma Şehbayê di bin topên dagirkeriya Tirkiyê û siyaseta dorpêça
hikumeta Şamê de tê meşandin. Ji 6 salan ve di bin şert û mercên zehmet û bi taybet di demsalan zivistanê de bi hezaran xwendekarên Efrînê xwendina xwe dikin û hemû astengiyan ji xwe re dikin hêz. Peymangeha Şehîd Viyan Amara yek ji mîrasên herêma Efrînê ye ku derbasî Şehbayê jî bû. Îsal 63 xwendekarên Efrînê di dewreya Sêyemîn de derçûn û bawernameyên xwe wergirtin. Careke din ji dijmin re îsbat kirin ku ne topbaranên ji agir û ne jî siyaseta birçîbûn û talankirinê wê bikare hêz û hêviyên wan têk bibe. Bi ser navê Peymangehê Mamoste Cîhan Elo û xwendekarê bi navê Hisên Birîm ji rojnameya me re axivî.
Bi kêm derfetan armancên mezin tên bidestxistin
Cîhan di destpêkê de hemû xwendekar pîroz kirin, her wiha anî ziman ku ev sêyemîn derçûn di koçberiyê de tê derxistin û wiha domand: “Bê guman rewşa ku herêma Şehbayê tê re derbas dibe xuya ye, ji 6 salan ve êrîşên dagirkeriya Tirkiyê li ser gelê sivîl nehatine rawestandin. Her wiha dorpêça hikumeta Şamê ya ku bi armancên siyasî tê ferizkirin hemû dibin bend li hember tavahî pêşketin û bi taybet li hember xwendinê. Lê rûxmî vê yekê jî her sal serkeftin û îradeyeke mezin ji hemû cîhanê re tê raber kirin. Ev yek bi serê xwe têkbirina dagirkeriyê ye. Ji beşên Bîrkarî, fîzîk û kîmiya, mamosteyên refê, wêje û zimanê Kurdî û Piyeolojî 63 ê xwendekarên me derçûn. Di 3’yemîn dewre de em carake din soza xwe ya tolhildan û berxwedaniyê nû dikin”.
`Di koçberiyê de xwendin, Têkoşîna li hember dijmin e`
Her wiha xwendekarê beşa ziman û wêjeya Kurdî Hisên destnîşan kir ku wan bi biryardarî û hezkirin hemû zehmetî derbas kirin û wiha got: “Di nava şert û mercên koçberiyê de xwendin, weke têkoşîneke li hember dijmin e. her çiqas zehmetî û tengahî rastî me hatin, pirî caran xwendekar jî dihatin hedef girtin. Lê belê ev nebû asteng li hember daxwaz û armancên me. Me bi biryardarî û hezkirin hemû zehmetî derbas kirin û salên xwe ya xwendinê qedandi”.
`Parastina zimanê dayîkê erka me ye`
Hisên di dawiyê de hilbijartina xwe ya ji bo beşa wêje û zimanê Kurdî anî ziman û wiha domand: “Şoreşa me bi bedelên gelek giran buha hat avdan û biserxistin. Di nava vê şoreşê de zimanê Kurdî ya ku her tim ji aliyê dijmin ve hatiye hedefgirtin û tepisandin. Careke din bi kedeke mezin hat îsbat kirin û gihîşt asta zanîêngeh û derbasî cîhanê bibe. Parastina nirxên şoreşê û ya zimanê Kurdî erka me ye. ji lewra min ev beş hilbijart da ku em vî nirxî biparêzin û derbasî nifşên nû bikin. Bi hezkirin û baweriyeke xurt emê bibin perwerdekarê nifşên pêşerojê”.