Bi hatine demsala zivistanê re herêma Şehbayê careke din di bin siyaseta dorpêçê re derbas dibe. Hikumeta Şamê careke din derbasbûna sotemeniyê ji herêma Şehbayê re qut kir. Hevserokê Desteya Şeredariya Efrîn û Şehbayê Mihemed Şêxo diyar kir ku ger rewş wiha berdewam bike wê rewşa gel aloztir bibe.
Zana Roj/ Şehba
Dorpêça hikumeta Şamê ya li ser koçberên Efrînê berdewam e. Ji ber wê jî gelek zehmetî tên jiyankirin. Lê dîsa
jî gel di asta herî jor ji berxwedanî û biryardariyê de xwedî sekin û helweste. Careke din bi hatina demsala zivistanê re Hikumeta Şamê siyaseta dorpêçê nû dike û rê li ber zehmetiyên mezin vedike. Madeyên esasî yên weke sotemeniyê derbasî herêmê nabe, bê guman ger ev made nîn bin tevgera gel û jiyanê ji ji sedî 70 tê rawestandin.
Têkildarî dorpêça hikumeta Şamê hevserokê Desteya Şeredariya Efrîn û Şehbayê Mihemed Şêxo ji rojnameya me re axivî.
Siyaseta dorpêçê xwe nû dike
Mihemed Şêxo bal kişand ser girîngiya xebatê wan û wiha domand: “Xebatê şeredariya gel herî zêde di nava civakê de tê meşandin, weke stûnekî bingehîn ya civakê ye. Gelek pilansazî û pirojeyên nû me dest pê kiribûn. Lê careke din hikumeta Şamê bi siyaseta dorpêçê rê li pêşiya me digre. Bi vê yekê re jî herî zêde gel dibe qurbaniya van siyasetan. Madeya herî bingehîn ku tavahî xebatê me de rol dilîze ew jî sotemeniye. Lê ev made niha ji aliyê hikumeta Şamê ve derbasî herêmê nabe. Di encamê de em mecbûr man ku aliyetên xwe û pirojeyên ku me dane dest pê kirin, her wiha xebatê di nava gel de bidin sekinandin”.
‘Ji ber dorpêçê li Şehbayê av û elektirîk hat qutkirin’
Mihemed anî ziman ku zivistan bê mazot nayê derbaskirin, herwiha kêmbûna avê û tunebûna elektirîkê rewşa gel ber bi karîsetê ve dibe wiha domand: “Di destpêka zivistanê de qederek ji sotemeniya ji bo gel hat belav kirin, lê belê ev qeder em dizanin heyanî dawiya zivistanê wê têra wan neke. Dibe ku gel mecbûr bimîne û wisa demsala zivistana hişk derbas bike. Lê ya girîngtir qutbûna avê di nava gel de ye. Belavkirina avê bi riya şeredariyê tê kirin, lê di rewşa heyî de em mecbûr man ku menhelên avê rawestînin. Her wiha di aliyê elektirîkê de, berê rojê 4 seat elektirîk hebû, lê niha bi temamî hat qutkirin. Yanî em dikarin bêjin rewş ber bi kirîzeke mirovî ya kûr ve diçe.”
`Divê raya giştî li hember sûc û kiryaran bi erkên xwe rabe`
Hevserokê Desteya Şeredariya herêma Efrîn û Şehbayê Mihemed Şêxo banga raya giştî û saziyên mafê mirovan kir ku bi erkê xwe rabin û wiha axaftina xwe bidawî kir: “Li hemebrî rewşa ku gelê Efrînê ji 6 salan ve tê re derbas dibin, hemû cîhan û saziyên mafê mirovan yên navnetewî berpirisyarin. Zêdetirî 5 sala ye em banga raya gistî dikin ku bi erkên xwe rabin û rê li ber êrîş û dorpêçê bigirin. Careke din bi berxwedanî û îsrardarî em bangawaziya xwe nû dikin. Em banga raya giştî û saziyên mafê mirovan yên navnetewî dikin ku bibin destek û rê li hember van sûc û kiryarên derheqê mirovahiyê de dibe, bigirin”.