Di şikefteke kevnar de xortê Efrînî Ebdo tembûrên ku saz, awaz û çanda welatê wî diparêze çêdike. Ebdo çêkerekî tembûra ye ku di şert û mercên zehmet de tembûran çêdike.
Zana Roj/ Şehba
Ebdo Resulo, ji gundê Keferdelê yê girêdayî navçeya Cindirêsê ye. Dema koçberî
Şehbayê bûne dest bi xebatên çêkirina tembûran kir. Ebdo bavê Sê zaroka ye û li gundê Ziyaretê ya navçeya Şêrawa jiyan dike.
‘Ji darên hişk tembûran çêdike’
Ebdo di destpêkê de anî ziman ku ji mereqa lêdana tembûrê ew fêrî çêkirina amûrê jî bû û wiha got: “Piştî ku em bi darê zorê ji Efrînê derketin. Em weke malbat li gundê Ziyaretê bi cih bûn. Kar û malên me hemû li pey me man û me dest bi jiyaneke nû li ser esasê vegera Efrînê saz kir. Lê belê şert û mercên jiyanê li vir gelek zehmet bûn. Ji bo xwedî kirina malbatê pêwîstî bi kar heye. Ez ji darên hişk tembûran çêdikim, ango ez ji amûra tembûrê pir hez dikim. Her wiha hezkirina ji saza temûrê ew meraqeke cuda ye. Rojek ji rojan min ji xwe re got “Çima ez tembûran çênakim?” Li ser vî bingehî min ev yek ji xwe re weke kar girt dest û hezkirina min roj bi roj mezin dibû”.
‘Ji pêkanîna xeyalê zarokekî min destpêkir’
Ebdo anî ziman ku yekemîn amûr da çêkirin ji zarokekî re bû û wiha domand: “Cara ewil min dest bi çêkirina tembûrê kir, ew jî li ser daxwaza zarokekî ku gelek meraqê wî li ser hebû min çêkir. Bi derfetên kêm min textên kevin yên di malan de kom kirin û min tembûreke biçûk li gor temenê wî zarokî çêkir. Niha ew zarok bûye sazbendekî herî jêhatî. Bi vê gavê êdî îlhama min mezintir bû û wiha ev kar hat destpêkirin.”
‘Ji tûnebûnê hebûn tê afirandin’
Ebdo diyar kir ku di herêma Şehbayê de çêkirina tembûran karekî gelek zehmete û wiha got:”Li ser giştî herêma Şehbayê û gundewarên Şêrawa dorpêça hikumeta Şamê heye. Û di rewşeke wiha de çêkirina tembûrekê gelek zehmetî û ked dixwaze. Text û alavên taybet yên pêwîst em nikarin bi hesanî peyda bikin. Her tembûrek ku heyanî bê amede kirin herî kêm 3 mehan dem dixwaze. Di halê hazir de textên ku di nava gel de nayên bi karanîn ez kom dikin û ji wan tembûran derdixim. Dukaneke min a taybet ya kar nîne. Ez di mala xwe de di şikefteke gelek kevnar de karê çêkirina temûran dikim. Her kes matmayî dimîne, lê belê tiştekî ne xeyaliye. Em mecbûrin li gor rewşa heyî tev bigerin û ji tûnebûnê hebûnê biafrînin. “
