Hemza Sêvo/ Qamişlo
Hêzên Ewkeariya Hundirîn a Bakur û Rojhlatê Sûriyê di 27’ê Cotmehê de dest bi pêngava ‘Tolhildana Şehîdên Hêzên Dijî Madeyên Hişbiriyê’ kirin. Fermandariya Giştî ya Hêzên Ewlekariyê da zanîn ku armanc ji destpêkirina vê pêngavê parastina ewlekariya civakî ye.
Hêzên Ewlekariya Hundirîn a Bakur û Rojhilatê Sûriyê Di 27’ê Cotmehê de dest bi pêngavya ‘Tolhildana Şehîdên Hêzên Dijî Madeyên Hişbiriyê’ kir.
Ji bo parastina ewlehiya civakê û rêgirtina li hemberî belavbûna madeyên hişbir, Hêzên Ewlekariya Hundirîn li Reqayê dest bi pêngava Tolhildana Şehîdên Hêzên Dijî Madeyên Hişbiriyê kir.
Di pêngavê de firoşkar, qaçaxçî û bikarhênerên madeyên hişbir bûn armanc û 42 kes hatin hatin girtin û qaseyek mezin ji madeyên hişbir hate desteserkirin.
Hêzên Ewlekariya Hundirîn li ser malpera xwe ya fermî amarên ku di pêngavê de hatine desteserkirin ragehand û wiha bû:
557000 hebên kaptagon, 60 kefên heşîşê, 2 çekên kilaşînkovê, 13 cercûrên kilaşînkov, 3 damanceyên 9mm, 5 narincok, 6 Cercûrên damanceyê, 10 çekên spî, Kirîstal mîs 2 kîlo û 700 kg, 261mermiyên kilaşînkovê, 53 mermiyên eyar 9 mm, 41 mermiyên BKS, amûrên bikaranîna hişbirê û 23 telefon.
Têkildarî pêngavê fermandariya Giştî ya Hêzên Ewlekariya Hundirîn a Bakur û Rojhilatê Sûriyê ji rojnameya me re axivî.
‘Armanc ji pêngavê parastina ewlehiya civakê ye’
Fermandariya Giştî ya Hêzên Ewlekariya Hundirîn a Bakur û Rojhilatê Sûriyê da zanîn ku armanc ji destpêkirina Pêngava ‘Tolhildana Şehîdên Hêzên Dijî Madeyên Hişbiriyê’ ji bo parastina ewlehiya civakê ye û wiha domand: “Em dizanin ku li ser gelên Bakur û Rojhilatê Sûriyê şer bi hemû awayên xwe tê meşandin, çi şerê leşkerî be an jî yê taybet û derûnî be. Lewma me dest bi vê pêngava ewlekariyê kir. Armanca sereke ya pêngavê ew e ku civaka me jiyanek durist, bi ewle û bê madeyên hişbir derbas bike. Herwiha em tekez dikin ku wê pêngava dilsoziyê ya ku ji bo şehîdên me yên li Hemze Begê şehîd bûne hatiye destpêkirin, wê temamkirina riya ku dest pê kirine di şerê li dijî hişbirê de. Pêngav hemû herêmên me dike armanc û me di daxuyaniya ku derbarê pêngavyê belav kiribû de piştrast kir. Sedema destpêkirina wê li Reqayê ew e ku Reqa xwedî cihekî istratîcîke û ew bajarê ku hema hema di nîvê herêmên Rêveberiya Xweser de ye. Herwiha ev bajar di navbera hemû herêman de ye û me agahiya ku li ser amadekariyên operasyonên qaçaxçîtiya madeyên hişbir ên ku wê li Reqayê pêk werin û veguhestina wan bo herêmên din bi dest xistin.”
‘Hemû beşên Ewlekariya Hundirîn bêşdarî pêngavê bûne’
Rêveberiya Hêzên Ewlekariyê anî ser ziman ku hemû beşên Hêzên Asayîşê beşdarî pêngava Tolhildana Hêzên Dijî Madeyên Hişbiriyê yên Hemzebegê bûne û wiha doman: “Dagirkera Tirk şerekî taybet li dijî gelê me dide meşandin, bi taybet belavkirina madeyên hişbir li herêmên bakur rojhilatê Sûriyê. Tişta herî girîng ew e ku weke Hêzên Ewlekariyê li himberî vî şerî xebatê xurtir bikin. Hêzên Ewlekariya Hundirîn bi hemû beşên xwe yên cuda tevlî vê pêngavê bûne , di serî de Hêzên Dijî Madeyên Hişbir, Hêzên Operasyonê û Asayîşa Jinê. Li aliyekî din jî ji bo zêdekirina hişyariya gelê me li ser metirsiyên vê nexwşiyê û encamên neyînî wê çi bin li ser aramî û ewlehiya civakê me kiliyên hevbeş bi hemû saziyên pêwendîdar ên di nava Rêveberiya Xweser de binyad kir û li gor van têkiliyên hevbeş em tev digerin. ”
‘Armancgirtina Akademiya Hêzên Dijî Madeyên Hişbiriyê, ji bo qelskirina xebatên ewlekariyê ye’
Rêveberiya Hêzên Ewlekariyê destnîşan kir ku êrîşa ku li ser Akademiya Hêzên Dijî Madeyên Hişbiriyê ya ji aliyê dagirkeriya Tirk ve hat pêk hat, armanc jê lawazkirina xebata Asayîşê ye û wiha got: “Hedefgirtina Akademiya Têkoşîna Dijî madeyên hişbirê bi rêya balefireke şer a dewleta Tirk û şehîdxistina 29 endaman, bi taybet aramî û ewlehiya civaka me bû hedef, hedefgirtina hêzên Dijî madeyên hişbirê ji bo qelskirina xebatên ji bo tunekirina madeyên hişbir bû, lê em di Hêzan Ewlekariya Hundirîn de vîn û îradeya me zêde bû ji bo temamkirina erka xwe ya rakirina madeyên hişbir û parastina civaka xwe ji xetereyên wan e. ”
‘Divê gel bi Pêngava Hêzên Ewlekariyê re bibin alîkar‘
Fermandariya Giştî ya Hêzên Ewlekariya Hundirîn a bakur û rojhilatê Sûriyê diyar kir ku ji bo pêngava dijî madeyên hişbiriyê bi rêk û pêk bimeşe divê gel bibe destek ji Asayîşê re û wiha bi dawaî kir: ” Em hertim giringiyê didin rola milet di piştevaniya hêzên xwe de di hemû pêngav û çalakiyên ku em dikin de, û banga me ji milet re ew e ku her tiştê ku şik û gumanan li ser bikaranîna madeyên hişbir û belavkirina wê de çêdike ragihînin. Ji ber ku hevkariya di navbera hêzên me û gel de sedema sereke ya bidestxistina civakeke ewle û bê madeyên hişbir e.”
