Ahmed Aktaş
Di 9ê Cotmeha 1998an da, êrîşa dijberî Rêber APO hat destpêkirin.
Erê weke planger dewleta tirk hat xuya kirin, lê biryara vê komployê, di asta pir bilind de hat standin.
Di serî de DYEyê û NATO heye, belê pir dewletên nasyar ên cîhanê, weke Rusya, Yunanistan, Israil, Misir û hwd. di vê projeyê de cih girtin.
Gelo çima?
Ji ber ku êdî civakên cîhanê, bi siyasetên kevnar re, nikaribû bihatina birivîvirin. Hewcedarî bi dizaynek/sererastkirinek nuh hebû.
Ji bo ku derbasî serdemek nuh bibin û pergalên nuh saz bikin, divya kelemên pêşiya vê projeya xwe rakin.
Hegemonan, astengek herî mezin li ber pêşkeftina xwe û alternatif, felsefe û tevgêra azadiya gelê Kurdistanê didîtin.
Ji bo vê tevgêrê hilweşînin, her cûre êrîşên siyasî û leşkerî dan destpêkirin. Dîtin ku, heta Rêberê vê felsefê û tevgerê dîl negrin, nikarin vê tevgêrê bixin xizmeta xwe an jî hilweşînin.
Di encamê vê qenaetê de, 9’ê Cotmeha 1998an biryar dan ku êrîşî Rêber APO bikin. Û li pey vê biryarê hewldanên piralî meşandin, gelek dewlet kirin hevparê vê KOMPLOYÊ û di 15’ê Sibata 1999an de, li Kenyayê pêngava ewil pêkanîn; Rêbar APO dîl girtin.
Ji bo ku gelên cîhanê bixapînin, êdî dest bi her cûre amûrên siyaseta derewîn kirin. Bi navê demokrasiyê, azadiyê, mafên mirovan, bahara filan gelan û hwd. prapaganda meşandin.
Bi vê şêwazê, çendîn welat xistin nava şer, çendîn malwêranî pêkanîn û hîn jî dewam dikin, li ber çava ye.
Piştî mînakên Efxanistan û Iraqê, şer derbasî hemû Rojhilata Navîn û Efrîqayê bû. Nuha jî li Ukraynayê şer gihiştiye çi astê diyar e.
Bi kurtayî şerê cîhanî yê 3an, di rojevê de ye û hîn çendîn xeter li pêşiya gelan e “êdî xwedê zane”!
Piştî vê komployê û ewqas şer û xwînrijên li cîhanê, gelo li Kurdistanê çi bûn?
Pêşî divê ev were dîtin ku, îrade û dûrbîniya Rêber APO, rê li pêşiya van plangeran girt û ev komplo negihişt armanca xwe.
Bi filozofiya hemdemî pêşewazî li vê plangeriya ewqas mezin û berfireh kir. Bi hostayî û xweragiriyek demdirêj, bi afirandina stratejî û tektîkên nûjen, ne bi tenê komplo pûç kir û vala derxist, belê bi rêzanî û îradeyek mezin, mejiyê welatparêzên Kurdistanê rohnî kir û rê vekir. Tirs şikand, bi curetê xurt, gel û hevalên xwe dîsa rakir ser piya û ji berê xurtir tevger kir.
Kurt û kurmancî dubare hunerê rêveberiya xwe nîşanî dostan û dijminan da.
Li ser bingeha vî rûh û ronahiya ji Imraliyê rûda, li hemû Kurdistanê agirê şoreşê bilintir bû. Bi pêşengtiya jin û ciwanan, li Rojava şoreş pêkhat. Ev bayê şoreşê li Rojhilat, bi dirûşma JIN JIYAN AZADÎ bahoz rakir.
Niha ev ruhê ba û bahoza şoreşgerî, bandora xwe li cîhanê dike.
Ji ber ku hêzên komploger, ji hatina pêla giran a lehiyê ditirsin, li Imrali tecrîdê girantir dikin û li ser destkeftiyên Kurdistanê êrîşan zêdetir dikin.
Ev tê wateya; divê her Kurdistaniyên welathez, li hember van êrîşên plangeran, xwe hîn pirtir bi rêxistin bikin, Rêber û destkeftiyên xwe hîn zêdetir biparêzin!
