Li nançeya Bedlîsê Tetwanê 5 gundiyên di 1990’î de ji gund hatin derxistin û di 2009’ê de vegeriyan gundê xwe hatin cem hev û kooperatîfa bi navê Kavar ava kirin. Kooperatîfa Kavar wek nimuneyeke serkeftî ya aboriyê derket pêş û di komunê de 40 jin hilberînên xwezayî hildiberînin. Dahatuyê jî di nav xwe de wekhev parve dikin.
5 gundên di navbera Tetwana Navçeya Bedlîsê û Wanê de dimînin û di 1990’ê bi zorê hatin valakirin hatin cem hev û Kooparatîfa Lipêşxistina Çandiniyê ya bi navê Kavar ava kirin. Kooparatîfê di Çileya 2009’ê de dest bi xebatê kir û her diçe xwe mezin dike. Seroka Desteya Rêveber a Kooperatîfa Lipêşxistina Çandiniyê ya Kavar Gurgîn Karabey da zanîn ku wan di destpêkê de bi 3 jinan dest bi vê xebatê kir. Lê niha em 40 jin bi hev re dixebitin. Kooperatîfa me ji sedî sed hilberîna xwezayî ya nok, beqlik, hingiv û hwd. dike.
Karabey da zanîn ku gundiyên Dîbek, Duzceala, Bolalan, Kolbaş û Yassı hatine gel hev û kooperatîf ava kirine û wiha got: “Kavar navê cih û warê 6 gundên ku di navbera Wan û Tetwanê ye û di 1990’ê de hatin valakirin re tê gotin. Herêmeke biçûk e. Lê pir bi bereket e. Xwedî zozan û goleke xweşik e. Gundiyên di 1990’ê de ji gundên wan hatin derxistin, di 2000’ê de vegeriyan. Gelên Kavar ji aboriyê ve lewaz bûn. Me jî wek fikrek dê çewan karibin bibin destek û vê karê kooparatîfê li pêş xist. Kooperatîfa me ji kooperatîfên din cihêtir e. Armanca me ev e gelên li Kavar dijîn muhtacê tu nekesan nebin û me baweriya wan a ji bo ked û pergala wan a aboriyê re xurtir kir. Feraseta me ya kooperatifê jî ev e.
Niha di kooperatîfê de 40 jin dixebite. Hedefa me meztire. Em dixwazin hê zêdetir jinan di kooperatîfê de bicihkin û derfetê aboriyê ji bo wan bidin afirandin. Ez jî wek karkereke ji dil di kooperatîfê de dixebitim.”…MA
Vegerîn gundê xwe û komîn ava kirin
