Hevserokê Partiya Herêman a Demokratîk (DBP) ê Wanê Harûn Okay got, tecrîda li ser Rêberê Gelê Kurd Abdullah Ocalan li nava civakê dibe sedema rageşiyê û xwest, dawî li vê yekê bê anîn.
Hevserokê Partiya Herêman a Demokratîk (DBP) ê Wanê Harûn Okay têkildarî tecrîda li ser Rêberê Gelê Kurd Abdullah Ocalan axivî.
Harûn Okay bi bîr xist ku Rêberê Gelê Kurd Abdullah Ocalan sala 1999’an bi komployeke navneteweyî anîn Tirkiyeyê, ji hingî ve 24 sal in tecrîdkirî ye, lê belê salên dawî tecrîd di nava tecrîdê de hatiye ferzkirin û şert û mercên ragirtinê bi rengekî nehiqûqî hatine girankirin.
Okay destnîşan kir ku astengkirina hevdîtina Abdullah Ocalan a bi malbat û parêzerên xwe re zerareke mezin dide aştiya civakî û got,”Hiqûqa navneteweyî û hiqûqa navxweyî tê binpêkirin. Rola Abdullah Ocalan a ji bo aştiyê tê zanîn. Di navbera salên 2013 û 2015’an de ku hingî çalak bû, kesekî bi tenê nehate kuştin. Ji sala 2015’an û pê ve tecrîd di nava tecrîdê de lê hate ferzkirin. Divê tecrîda li ser Abdullah Ocalan tavilê bê bidawîkirin. Eger ev yek pêk were wê dijberiya li nava civakê de hatiye afirandin bi dawî bibe.”
‘Di mijara tecrîdê de bila gelê me hemû hişyar be’
Okay diyar kir ku astengkirina hevdîtinên bi Rêberê Gelê Kurd re li derveyî hiqûqê ye û got, “Divê Abdullah Ocalan karibe ji mafên hemû hikumxwaran sûdê werbigire. Ji bo pêkhatina aştiya civakî, em bang li gelên Tirkiyeyê hemûyan dikin ku di mijara rakirina tecrîdê de hişyar bin.”