Armanca sereke rizgarkirina Efrînê ye

Endamên Konferansa Rizgarkirina Efrînê di 2 civînên cuda de diyar kirin ku armanca wan rizgarkirina Efrînê ye.
Endamên Konferansa Rizgarkirina Efrînê li navçeya Şêrawa ya herêma Efrînê bi armanca nirxandina lêhûrbûn û biryarên konferansê 2 civîn li dar xistin.
Endamên Konferansa Rizgarkirina Efrînê li gundên Bênê û Aqîbê yên girêdayî navçeya Şêrawa ya Efrînê bi armanca nirxandina lêhûrbûn û biryarên ku di konferansê de hatine girtin û ji bo ku li welatiyan guhdar bikin, 2 civînên cuda li dar xistin. Bi sedan şêniyên Efrînê tev li civînê bûn.
Di her du civînan de encamnameya konferansa rizgarkirina Efrînê hate xwendin.
Endamekî konferansê axivî û destnîşan kir ku êrîşên li ser Efrînê hemû bi alîkariya dewletên navneteweyî û di serî de Rûsyayê ku derfet da Tirkiyê êrîşên hewayî pêk bîne, pêk hatin.
Hat destnîşan kirin ku şêniyên Efrînê 58 rojan tevî şervanên YPJ/YPG`ê li hemberî artêşa tirk a dagirker û çeteyên wê li ber xwe dan û heta niha jî berxwedana xwe li herêma Şehbayê didomînin.
Di axaftinan de hate gotin ku armanca dewleta tirk a dagirker tunekirina nasnameya kurdî ye û bi vê armancê komkujiyan li dijî kurdan pêk tîne.
Endaman di civînê de hemû lêhûrbûnên Konferansa Rizgarkirina Efrînê û girîngiya lehengiya şênî û şervanên YPJ/YPG`ê nirxandin.
Endaman kêmasiyên di saziyên rêveberiyê yên sivîl û leşkerî de ku li Efrînê derketin nirxandin û diyar kirin ku armanca konferansê ya sereke rizgarkirina Efrînê ye.
Şêniyan jî diyar kir ku ew ji bo rizgarkirina Efrînê amade ne da ku di demeke nêz de li warê xwe vegerin…ANHA