Şaredariya Şehbayê bi derfetên kêm xebatên xwe yê xizmetguzariyê ji bo gelê Efrînê yên li kampan û gundan bi cih bûne, didomîne û hewl dide pirsgirêkên gel çareser bike. Şaredariyê yek ji pirsgirêkên sereke, pirsgirêka avê çareser kir. Her wiha xebatên ji bo çareserkirina pirsgirêkên din jî didomîne.
Şaredariya Gel a Şehbayê xebatên xizmetguzariyê ji bo şêniyên Efrînê yên ku li gundan û kampên herêmê bi cih bûne, didomîne. Li herêmê pirsgirêka avê çareser dibe.
Di çarçoveya kar û xebatên Şaredariya Gel a Şehbayê de, şaredariy] ji sedî 70 ji pirsgirêkên avê çareser kir. Şaredariyê stêrên avê peyda kirin û xetên avê li nav gund û navçeyên Şehbayê dirêj kirin.
Ji bo av bi awayekî birêkûpêk li şêniyan bê belavkirin, şaredariyê ji bo her komînekê 100 stêr veqetandin. Di heman demê de, li kampên Şehbayê jî depoyên avê hatine bicihkirin û bi awayekî sîstematîk têne dagirtin.
Şaredariya Gel a Şehbayê rojane kolanên gund û navçeyên herêmê ji çopê û bermahiyan paqij dike. Her wiha şaredarî heteyê 2 rojan jî gundên biçûk paqij dike.
Tevî xebatên paqijiyê şaredarî xebatên sererastkirina xetên kanalîzasyonê li navçeyên Ehrez, Kefer Naya û gundên Til Qirah û El-Ehdas bi derfetên xwe yên heyî didomîne.
Girêdayî mijarê hevserokê Şaredariya Gel a herêma Şehbayê, Mihemed Elo tekez kir ku ew bi derfetên heyî hewl didin pirsgirêkên şêniyan çareser bikin…ANHA