Li Akademiya Şehîd Ebû Leyla bi hezaran şervanên hatine perwerdekirin, hêvî û armancên wî jiyanî dikin.
Dema ku em dîroka berxwedana Rojava, sembol û fermandarên wê bi bîr tînin, bêguman fermandar Feysel Ebû Leyla tê bîra me. Ebû Leyla bi hesert bû ku herêma xwe azad bibîne, ji bo wê jî heta kêliya şehadeta xwe (5`ê Hezîrana 2016`an) ji bo pêkanîna wê armancê têkoşiya.
Rizgarkirina minbicê yek ji armancên wî bû
Endamê rêveberiya Akademiya Şehîd Feysel Ebû Leyla ya girêdayî Meclisa Leşkerî ya Minbicê Mihemed Ezîz, behsa fedakarî û têkoşîna şehîd Ebû Leyla kir û got: “Salvegera şehadeta fermandar Ebû Leyla ku dikeve 5`ê Hezîranê, ne bûyerek asayî ye. Ji ber ku Ebû Leyla ji destpêka şoreşê de, yek ji sembolên berxwedanê û nimûneyeke têkoşîn û fedakariyê bû.”
Ezîz diyar kir ku rizgarkirina bajarê Minbicê ji çeteyên DAIŞ`ê yek ji armancên sereke yên şehîd Ebû Leyla bû û wiha dewam: “Wî zaroktî û ciwaniya xwe li Minbicê jiyan kir, di oxira pêkanîna biratiya gelan, jiyana hevbeş, aramî û aştiyê li tevahî herêmê de xwe feda kir. Ew bi têkoşîna xwe bû yek ji sembol û fermandarên Şoreşa Rojava.”
Fermandaê eniyên şer
Ezîz bal kişand ser pêngava rizgarkirina Minbicê jî û got: “Dema ku pêngava rizgarkirina Minbicê dest pê kir, şehîd Feysel Ebû Leyla û hevalên xwe li eniyên pêş ên şer bûn. Wî ji hevalên xwe re nedigot herin pêş, digot Ii pey min werin. Ebû Leyla ew pênav bi cesareteke mezin bi rê ve bir, heta ku gihaşt tixubên bajaroka Ebû Qelqel. Dema ku hin hevalên wî ketin dorpêça DAIŞ`ê, ew tavilê bi hawara wan ve çû û ew xilas kirin. Wê demê bi topeke hawanê birîndar bû û piştî du rojan şehîd bû.”
Akademiya şehîd feysel ebû leyla
Ji bo zindîkirnia têkoşîn û bîranîna wî, piştî rizgarkirina bajarê Minbicê (2016) Akademiya “Şehîd Feysel Ebû Leyla” hat vekirin û bi hezaran şervanên Meclisa Leşkerî ya Minbicê tê de perwerde dîtin.
Endamê rêveber ê akademiyê Mihemed Ezîz got: “Wek wefedariya me bi fermandar Ebû Leyla re, me akademiyek bi navê wî vekir, da ku şervanên herêmên werin perwerdekirin û têkoşîna wî bidomînin.” Di akademiyê de Waneyên aborî, civakî, exlaqî, demokrasî û dersên berxwedan, têkoşîn û şerê taybet jî tê de tên dayîn.
Mihemed Ezîz wiha axaftina xwe bi dawî kir: “Şehîd Feysel Ebû Leyla bi têkoşîna xwe ya bi salan dihat naskirin. Wî wate da berxwedanê û ew bi serket. Piştî şehadeta wî jî bi hezaran keç û xortên ku bi wî bandor bûne, tevlî Meclisa Leşkerî ya Minbicê bûn. Li akademiyê rêwîtiya têkoşînê ya şehîd Feysel Ebû Leyla tê berdewamkirin.”
