Hejmarek jinên ku xwe ji dagirkeran rizgar kirin û ji Efrînê derketin xwe gihandin Şehbayê serpêhatiyên xwe derbarê kiryarên artêşa tirk û çeteyên wê de li hemberî jinan, vegotin.
Şêniyên Efrînê ku nikaribûn di dema dagirkirina Efrînê de, derkevin, niha piştî rêwîtiyên gelek zehmet û xeternak xwe digihînin Şehbayê. Hejmarek jinên Efrînê ku bûne şahidên binpêkirinên artêşa tirk û çeteyên girêdayî wê, serpêhatiyên xwe vegotin.
Welatiya bi navê Helîme Ebdo ya ji gundê Maratê yê girêdayî Efrînê wiha got: “Ji destpêka ku artêşa tirk û çeteyên wê gund dagirkirin, em di nav rewşeke gelek bi tirs de dijîn. Çeteyan her tim gef li jinan dixwarin.”
Helîmeyê da zanîn ku ew bûye şahidê gelek buyerên weke revandin û destdirêjî yên li dijî jinan. Helîme diyar kir ku çeteyan ji bilî dizî û talankirina malên welatiyan, ji bo zêr jineke pîr kuştine.
Helîmeyê diyar kir ku hemû şêniyên ku niha li Efrînê dimînin dagirkeriya tirk qebûl nakin û li benda rizgarkirinê ne.
Dayika Qedriyê Reşîd diyar kir ku ew di dirêjahiya jiyana xwe de her tim di nav gund bi serbestî digeriya û çandinî dikir, lê niha piştî dagirkeriyê ew nikare bi dilê xwe derkeve, ji ber ku artêşa tirk gelek kiryar û kirinên ne exlaqî li dijî jinan dikin.”…ANHA
Jinan zilma dagirkeran vegotin
