Di çalakiya pîrozbahiya salvegera yekemîn a damezirandina Meclîsa Jin a Tebqayê de hate gotin ku ne ji Şoreşa Rojava buya jinan mafên xwe bi dest nedixist.
Meclîsa Jinên Tebqayê bi boneya salvegera yekem a damezirandina meclîsê şahiyek lidar xist.
Şahî li hewşa avahiya meclîsê ya li taxa Sanî ya bajarê Tebqayê hate lidarxistin. Hewş bi şirîtên renge reng, wêneyên şehîdên YPJ û YPG‘ê, dirûşmeyên “Jin, Jiyan , Azadî” û “Jina zana bingeha avakirina civakeke saxlem e” hatibû xemilandin.
Hevseroka Meclîsa Rêveber a Rêveberiya Sivîl a Demokratîk a herêma Tebqayê Hind Elî, Seroka Buroya Partiya Sûriyeya Pêşerojê ya Tebqayê Musena Ebdulkerîm û bi dehan şêniyên herêmê amade bûn.
Di şahiyê de Rêvebera Meclîsa Jinên Tebqayê Sûad Oso bi xêrhatina beşdaran kirin.
Sûad Oso got, “Ne ji Şoreşa Rojava buya em nedighiştin asta damezirandina meclîsan û jinan mafên xwe bi dest nedixist. Damezirandina Meclîsa Jin, serkeftina li hember zilm û kolekirina jinan e.”
Sûad Oso, her wiha karê ku meclîsê di nava salekî de pêk aniye bi bîr xist û destnîşan kir ku meclîsê giraniya karê xwe da ser perwerdekirina jinan û vekirina projeyên aborî.
Bi navê Saziya Malbatên Şehîdan Reşa Taha jî axivî û got “Jinên herêma Tebqayê soza şopandina xeta şehîdan dane da ku em bi azadî bijîn.”
Piştî axaftinan, Koma “Beraim Tebqa” ya girêdayî Komîteya Çandê dilanên gelêrî pêşkêşkirin. û li ser hovîtiya DAIŞ’ê helbest hatin xwendin…ANHA
Jinan salvegera damezirandina meclîsê pîroz kir
