Endamê Meclisa Giştî ya Partiya Yekîtiya Demokratîk Mihemed Emîn Elîko diyar kir ku armanca Hikumeta Şamê ji dorpêça li ser Şehbayê şikandina îradeya gelê herêmê ye û got, divê gel , hiqûqnas û hemû kesên elaqedar dengê xwe bighînin Cîhanê da ku dorpêç bê şikandin.
Norşîn Sîno\Qamişlo
Dema ku dewleta Tirk ya dagirker herêma Efrîn kir hedef, bi hezaran gelê Efrîn bi darê zorê koçberî herêma Şehba bûn. Hikumeta Şamê bi meşandina siyaseta xwe ya dorpêçê li ser gelê herêmê xwest ku îrade û berxwedaniya wan têk bibe.lê belê ev yek nebû .Lewra roj bi roj firqeya çaremîn ya girêdayî Hikumeta Şamê dorpêça li ser gelê herêmê girantir dike û derfet nade ku pêdiviyên xwejiyankirinê wek pêdiviyên tendrustiyê , Ard û sotemenî derbasî herêmê bibe.
Derbarê dorpêça girankirî ya li ser herêma Şehba yê endamê Giştî yê Partiya Yekîtiya Demokratîk (PYD) Mihemed Emîn Elîko ji rojnameya me re axivî.
`Armanca Hikumeta Şamê şikandina îradeya gel e`
Endamê Meclisa giştî ya Partiya Yekîtiya Demokratîk (PYD) Mihemed Emîn Elîko diyar kir ku Aarmanca Hikumeta Şamê ji dorpêça li ser Şehba şikandina îradeya gel e û wiha axivî: ” Siyaseta Hikumeta Şamê li ser gelê herêma Şehba ne ji niha ve ye. Ev 5 salin gelê Şehba li hember siyaseta wan ya qirêj li berxwe dide. Armanca wê jî şikandina îradeya gelê herêmê ye , Ji ber ku di texmîna wan de bi wergirtina pereyên zêde û nederbaskirina madeyên sotemeniyê yên ku bingeha jiyanê temsîl dike, ew ê karibin têkoşîn û berxwedana gel bişkînin , lê belê gelê Efrînê bi îsrarbûyîn li hember van siyasetan li berxwe dide û tavahî pilanên dijmin vala derdixin.”
`Dorpêç li ser jiyanana gel bandor dike`
Mihemed Emîn da zanîn ku dorpêçkirin roleke pir xirab di milê xizmetkirina Civakê de ji aliyê xwe Jiyankirinê de dilîze û wiha domand: “Di milê xwejiyankirina ji aliyê gel de dorpêç roleke pir xirab dilîze wek di milê tendrustiyê de pêdivî gelek kêm in bi taybet piştî erdhejê de, Firqeya çaremîn a girêdayî Hikumeta Şamê rê neda ku alîkariyên xwarin û vexwarin, her wiha derman, erebeyên alîkariyê derbasî herêmê bibin.Ev jî bandoreke neyînî li ser jiyana gelê herêmê kir.”
`Saziyên mirovî û navdewletî çavên xwe li ser van kiryaran girtiye`
Elîko di heman demê de balkişand ser rola Saziyên mirovî û navnetewî di rewşa ku tê jiyankirin de û wiha dirêjî da gotina xwe: “Saziyên mirovî û yên Navnetewî ji bo berdewamkirina berjewendityên xwe I herêmê, tu destwerdanênên cidî ji bo çareserkirinê nakin. Ev yek jî ji me re dide diyarkirin ku tavahî dewletên heyî li ser xwîna gel xwe didin mezin kirin ”
` Divê gel , hiqûqnas û hemû kesên elaqedar dengê xwe bighînin Cîhanê`
Endamê Meclisa Partiya Yekîtiya Demokratîk (PYD) Mihemed Emîn Elîko destnîşan kir ku divê gel , hiqûqnas û hemû kesên elaqedar dengê xwe bighînin Cîhanê û wiha axaftina xwe bidawî kir: “Ji bo têkbirina dorpêçê divê gel, hiqûqnas û hemû kesên elaqedar dengê xwe bighînin Cîhanê û bihêlin saziyên Navnetewî çavên xwe li ser kiryarên ku di derheqê gel de tê kirin vekin . Gerek herkes xwe li hember çareseriya aloziya Sûriyê berpirisyar bibîne. Di nêrîna min de ku ev tişt li kêleka berxwedaniyê û têkoşînê bê kirin wê dorpêç were şikandin û gel karibin bi aramî bijîn.”