Navenda Mafên Mirovan a Sûriyê ragihand Rûsya û komên çete yên li Quneytra li hev kirin da ku kesên şerker tevî malbatên xwe derbasî bakurê Sûriyê bibin. Navendê ragihand ku herêmên ku çeteyên Heyet Tehrîr El-Şam û Cebhet El-Nusra jî tê de ne bi sponsoriya Rûsyayê li hevkirin pêk hatiye.
Rûsya li ser bajarokê Quneytra bi komên çekdar re li hev kir da ku kesên şerker tevî malbatên xwe herin bakurê Sûriyê yan jî bi rêjîmê re rewşa wan bê zelalkirin.
Navenda Mafên Mirovan a Sûriyê ragihand ku lihevkirin li ser çarenûsa Quneytra û hemû heremên wê bi sponsoriya Rûsyayê hatiye kirin, tevî herêmên di bin serweriya çeteyên Heyet Tehrîr El-Şam û Cebhet El-Nusra de jî.
Navendê destnîşan kir ku di lihevkirinê de hatiye erêkirin ku hemû kesên lihevkirinê napejirînin û malbatên wan wê werin şandin ber bi bakurê Sûriyê ve, tevî ku çekên xwe yên giran û navîn wê radest bikin û wê polîsên leşkerî yên Rûsyayê derbasî bajarok û gundên Quneytra bibin. Qeydkirina navên kesên ku li hevkirinê napejirînin pêk hat.
Ajansa SANA ya girêdayî rêjîma Sûriyê jî ragihand ku hin agahî hene li ser lihevkirinê û wê komên çekdar ên di parêzgeha Quneytra û Îdlibê de bên derxistin an jî wê sîstema dewletê bipejirînin.