Pêkanîna rewşa awarte (OHAL) ya di 20’ê Tîrmeha 2016’an de hat îlankirin û 7 caran hat dirêjkirin, 2 sal şûnde hat rakirin.
Pêkanîna OHAL’ê ya piştî hewldana darbeya 15’ê Tîrmeha 2016’an de hat îlankirin, di 18’ê Tîrmeha 2018’an de hat rakirin. Di çarçoveyê OHAL’ê de, 32 KHK (biryarname) hatin weşandin, 125 hezar û 800 peywirdarên cemawerî ji kar hatin avêtin, gelek sazî û dezgehên weşanê, weqf û komele hatin girtin.
OHAL’ê di pişt xwe de 2 salên tije, sansûr, êrîş, îşkence, girtin, qanûnên ne cezakirinê û binpê kirinên mafan hiştin.
Lİ KOLANAN DÎSA MAŞîNEYÊN ZIRXÎ HENE
Li bajarê Amedê wekî her car maşîneyên zirxî yên polîsan li kolanên bajar tûr diavêjin û tundiya xwe ya li ser gel didomînin.
Bendên kontrolê yên polîsan ên ku qaşo di çarçoveya Rewşa Awarte de li cihên herî qerebalix ên bajar hatibûn danîn, hê jî li cihên xwe ne û nehatine rakirin. Bendên kontrolê yên li hemû deriyên Sûrê jî ku hê jî hin taxên wê ji ketina mirovên sivîl re qedexe ne, li cihên xwe ne û nehatine rakirin. Kesên ku bi wesayîtên xwe ango bi pêya dixwazin biçin Sûrê di kontrola polîsan de derbas dibin û wiha dikarin bikevin Sûrê û derên. Bendên kontrolê yên li ser rêyan nehatine rakirin.
