Nehîr Pale
Li herêma Dêra Zorê ji êla egêdat (عقيدات) gelek xort tevlî QSD`ê (Hêzên Sûriya Demokratîk) bûn û li hemberî çeteyên DAIŞ`ê şer kirin. Malbata Cûma El-Selame yek ji malbatên ku ciyê xwe di rizgarkirina Dêra Zorê de girtin û bûn xwedî Şoreşger û Şehîdan.
Cûma El-Selame sala 1958`an li bajarê Bo-Kemal ê herêma Dêra Zorê ji dayîk dibe. Bajarê Bo-Kemal dikeve ser sînorê Sûrî û Iraqê. Heyanî sala 2012`an pêkhateya Ereb, Kurd û Aşûr lê diman û di asta civakî û aborî de danûstandina wan xurt bû. Ava çemê Firatê ber bi bajarê Bo-Kemal re derbas dibe û piştî bajarê Dêra Zorê bajarê Bo-Kemal ê herî mezin e. Sala 2012`an şêniyên Bo-Kemal li hemberî Hikûmeta Şamê şer dikin û wan ji bajar derdixin, piştî wê çeteyên DAIŞ`ê sala 2014`an Bo-Kemal dagir dikin heyanî 2016`an û radestî Hikûmeta Şamê û komên çekdar ên Îranê dikin.
Di encama şer de hejmareke mezin ji gelê Bo-Kemal koçber bûn, çeteyên DAIŞ`ê ew bajar tarûmar kirin û niha jî komên çekdar ên girêdayî Hikûmeta Şamê û Îranê di bajarê Bo-Kemal de ne û li bajar tiştek li ser hevdû nehiştin e.
Cûma El-Selame piştî ku dizewicê 18 zarok (8 keç û 10 lawik) jê re çêdibin. Zarokên wî li Bo-Kemal mezin dibin û hinek ji wan li wir malbata xwe saz dikin.
Têkoşîn ji Xalid destpê dike û bi Abdulah re fereh dibe
Sala 2011`an piştî ku Bihara Gelan li Sûriyeyê destpê dike, hikûmeta Şamê bajarê Bo-Kemal bombebaran dike û yek ji kurê Cûma El-Selame yê bi navê Ehmed sala 2012`an tê kuştin, dîsa jî weke malbat ji bajarê xwe dernakevin heyanî ku çeteyên DAIŞ`ê bajarê wan dagir dikin.
Kurê Cûma El-Selame Xalid yê ku sala 1982`an ji dayîk bibû, ji ber zextên çeteyên DAIŞ`ê li ser wî û malbata wî, tevî hevjîn û keça xwe sala 2014`an derbasî herêma Girê Spî dibe. Li wêderê QSD`ê (Hêzên Sûriya Demokratîk) dinase û sala 2015`tevlî wan dibe. Beşdarî hemleya rizgarkirina Tebqa ji çeteyên DAIŞ`ê dibe û sala 2017`an li Tebqayê şehîd dibe.
Piştî ku çeteyên DAIŞ`ê agahî digrin ku Xalid El-Selame tevlî QSD`ê buye û li hemberî wan şer dike, zextê li malbata Xalid El-Selame dikin û malbat neçar dimîne ji bajarê xwe Bo-Kemal derbikevin û derbasî gundê Şaife yê herêma Dêra Zorê bibin.
Bi navê Şehîd Xalid El-Selame foc ava dikin
Bira, Ap û pismamên Şehîd Xalid El-Selame piştî şehadeta wî sala 2018`an focekî li xeta şerqî ya herêma Dêra Zorê ava dikin û nav lê dikin Foca Şehîd Xalid El-Selame. Gund bi gund digerin û xortan birêxistin dikin heyanî ku hejmara focê dighêje 1300 şervanî. Focê Şehîd Xalid El-Selame ciyê xwe di hemleyên rizgarkirina Dêra Zorê de digrin û niha jî di parastina herêmê de berpirsyartî radikin.
Abdullah tevlî Tevgerê dibe û Wenes jî şehîd dibe
Sala 2018`an Wenes El-Selame (Seqir) yek ji birayê Xalid El-Selame yê ku rêça wî şopand û tevlî QSD`ê dibe, ew sala 1985`an ji dayîk dibe, heyanî dibistana navîn dixwîne û 3`ê zarokên wî hene. Sala 2019`an jî şehîd dibe.
Abdullah El-Selame jî sala 2018`an tevlî Tevgera Azadiyê dibe, navê birayê xwe yê Şehîd Xalid radike. Ew sala 2001`an li bajarê Bo-Kemal ji dayîk dibe û ji ber şert û mercan nikare bixwîne.
Malbata Cûma El-Selame ji malbatên ku koletiyê napejirînin û ciyê xwe di nava têkoşînê de digrin. Ji malbatê du xort şehîd dibin, yek jî tevlî Tevgera Azadiyê dibe û 4 jî (Cabir El-Selame, Elî El-Selame, Selame El-Selame û Mihemed El-Selame) niha şervanên QSD`ê ne.