Jinên Ereb ên ku ji bo parastina jin û xaka xwe di nava artêşê de cih girtin, diyar kirin ku têkoşîna YPJ’ê di avakirina nasnameya wan a şervan de bi bandor bû.
Hêzên Sûriyeya Demokratîk (QSD) bi pêşengiya Meclîsa Leşkerî ya Minbicê bi pêngava ku di 1’ê Hezîrana 2016’an de dabû destpêkirin, di 15’ê Tebaxa 2016’an de bajarê Minbicê yê Bakur û Rojhilatê Sûriyê bi temamî ji çeteyên DAIŞ’ê rizgar kir.
Yekîneyên Parastina Jin (YPJ) ya mîna Meclîsa Leşkerî ya Minbicê di bin sîwana QSD’ê de jî cih digre gav bi gav di rizgarkirina Minbicê ji çeteyên DAIŞ’ê de rolek mezin lîstin. Gel û jinên Minbicê yên ku di jiyana xwe de cara yekem şervanên jin dîtin, ji şervanên YPJ’ê gelekî bandor bûn.
Tevlîbûn û helwesta YPJ’ê ya di her qonaxa pêngava li dijî DAIŞ’ê de rê li pêşiya jinên Minbicê vekir ku rêxistinên xwe yên parastinê bi pêş bixin. Piştî rizgarkirina bajêr gelek jinên Ereb beşdarî leşkerî bûn û xweparastina jinan pêş xistin.
Li Minbicê ya ku di serdema DAIŞ’ê de tarîtîyeke dijwar derbas bû, îro jin ji leşkerî heta siyasî, aborî, jiyana civakî û rêveberiyên herêmî di her qadê de pêşengiyê dikin.
Jinên Ereb ên têkoşer anîn ziman ku ew di bin bandora YPJ’ê û têkoşîna jinên Kurd de hatin qada leşkerî.
‘Min digot tenê jinên Kurd şer dikin‘
Ola Yehya ku di sala 2022’an de di nava Meclîsa Leşkerî ya Minbicê de cih girt, diyar kir ku ji bo parastina xaka xwe û jinên xwe di qada leşkerî de cih girtiye û got, “Dema ku bajarê Minbicê hate rizgarkirin, jinên bi porê hûnandî çek li ser milên wan digeriyan gelek bandor li min kir. Min meraq kir ku jin çawa çek hilgirtin û çawa şer kirin. Dema min şervanên YPJ’ê dît, min digot qey jinên Kurd çek hilgirtine. Min nizanîbû ku jinên Ereb jî di vî warî de cih girtine û li eniyan dest bi şer û têkoşînê kirine. Ev hemû tiştên ku ez dîtim, ji bo ku ez tevlî Meclîsa Leşkerî ya Minbicê bibim û parastina jinan bikim, ji min re teşwîqeke xurt çêkir.”
Bi têkoşînê zextên civakî ji holê rakir
Ola Yahya diyar kir ku tevlîbûna xwe ya Meclîsa Leşkerî ya Minbicê di jiyana wî de xaleke werçerxê ye û got, “Ji ber ku min girîngiya jiyana azad bi fêrbûna felsefeya Rêber Abdullah Ocalan fêm kir. Heta ku em negihin armancên xwe û hemû jinan azad nekin, ez ê ji vê rê venegerim.”
Ola Yahya jî anî ziman ku dema wî biryar da ku bibe şervan, rastî zextên civakî hat, lê belê dev jê berneda û li ber xwe da.
‘Jinên Ereb ji têkoşîna YPJ’ê bandor bûn‘
Rêvebera Meclîsa Leşkerî ya Jinê ya Minbicê Fatima Muhammed jî got, “Hemû şervanên jin ên beşdarî Meclîsa Leşkerî ya Minbicê bûne, ji têkoşîna YPJ’ê gelekî bandor bûne û ev yek bûye sedema veguhertineke radîkal. Di nava me de şervanên ji hemû pêkhateyên Ereb, Kurd, Çerkez û Tirkmen hene. Ti pêkhate nehatin biçûkxistin û dûrxistin.” JÎNHA