Parêzer Selwa Ecac destnîşan kir ku Rêberê gelê Kurd Abdulah Ocalan ji bo azadiya jinê û gelên bindest tekoşîneke bê hempa daye meşandin.
Derbarê tecrîda giran a li ser Rêberê gelê Kurd Abdulah Ocalan parêzera bi eslê xwe Ereb Selwa Ecac diyar kir ku Ocalan afrînerê felsefeya azadiya jinê ye. Ecac wiha got, “Dîlgirtina wî li dijî mirovahiyê zilma herî mezin e. Dewleta Tirk bi girankirina tecrîdê re dixwaze ramanên Rêber APO ji civakê qut bike û bê parastin bihêle. Bi taybet jî jinan dixwaze kole bihêle.”
Ecac bi bîr xist ku Rêberê gelê Kurd Abdulah Ocalan di encama komployekî navneteweyî di de dîl hate girtin û wiha dewam kir, “Dewleta Tirk bi serkêşiya sîstema faşîst a AKP-MHP û Erdogan ev çend sal in tecrîd li ser Rêber Ocalan şidandiye. Bi tena serê xwe li girava Îmraliyê di nav çar dîwaran de hebisandiye. Destûrê nade malbat, parêzer û delegeyan ku serdana wî bikin. Bi vî rengî jî dewleta Tirk hiqûqa navneteweyî û ya hundirîn bi awayekî bê bext bin pê dike.”
Parêzer Selwa Ecac dawiyê de ev bang kir: “Ji bo şikandina tecrîda li ser Rêber APO ez weke parêzer bang li sazî û dezgehên navneteweyî yên eleqedar dikim ku bi awayekî lezgîn mudexeleyî bê hiqûqî û destdirêjiyên dewleta tirk bikin û vê tecrîda giran li ser Rêber APO bişkînin. Azadiya Rêber APO misogeriya wekhevî, edalet û jiyana azad e…
Posta çûyî
Posta tê