Komîteya Perwedehiyê ya KJK’ê diyar kir ku Zimanê Dayîkê remz, nasname û çanda gelan e û got, em bang li tevahî gelê xwe dikin ku, li dor mamoste û kedkarên ziman hîn bêhtir bibin yek û berê xwe û zarokên xwe bidin perwerdeya zimanê Kurdî.
Navenda Nûçeyan
Bi wesîleya 21’ê Sibatê Roja Zimanê Dayikê ya Cîhanî Komîteya Perwedehiyê ya KJK’êdaxuyaniyeke nivîskî weşand.
KJK’ê di daxuyaniya xwe de diyar kir ku zimanê dayikê nameya gelan e û wiha got: “Zimanê Dayîkê remz, nasname û çanda gelan e, mafê herî xwezayî û pîroz ê mirov e. Bi taybetî ji bo me gelê Kurd, wekî kedkarê rasteqîn ê zimanê Kurdî Rêber Apo ku bi têkoşîn û hewldaneke dijwar deriyê pêşketinê li zimanê me vekir, hişmendiya xwebûn û azadiyê li nav me belav kir”
KJK’ê balkişand ser girîngiya Roja Zimanê Dayîkê ya Cîhanê û wiha dewam kir: “Roja 21’ê Sibatê wekî roja zimanê dayîkê ya navnetewî xwediyê girîngiyek jiyanî ye. Zimanê dayîkê bi esasî nasnameya civakî ya mirov ava dike. Ziman tenê amûreke danûstandinê nîn e, bi esasî wekî nirxeke civakî dîrok, çand û nasnameya gelan a netewî şênber û domdar dike. Bi taybetî ji bo gelê Kurd ku sed sal zêdetir e ji mafê perwerdeya zimanê dayîkê bêpar hatiye hiştin, girêdayî polîtîkaya înkar û tunekirinê her tim rastî êrîş û hewldanên bişaftinê hatiye.
KJK’ê da xuyakirin ku pêwîste roja zimanê dayîkê ya navnetewî bibe roja xurtkirina têkoşîna zimanê dayîkê û parastina tevahî nirxên netewî û wiha domand: “Wekî gel divê em ji bo azadiya xwe, ji bo parastin û pêşxistina ziman, çand, dîrok û nasnameya xwe bi xwe bawer gav bavêjin, hêviyê ji tu hêzeke derve nekin. Herwiha em bang li tevahî gelê xwe dikin ku, li dor mamoste û kedkarên ziman hîn bêhtir bibin yek, piştgiriya pêwîst raber bikin, berê xwe û zarokên xwe bidin perwerdeya zimanê Kurdî, heta mafê perwerdeya zimanê dayîkê bigihe statuyeke fermî bênavber xebat û têkoşîna xwe bilind bikin.”
