Salvegera 7’an ya Şoreşa Rojava li Zanîngeha Rojava ya li Qamişlo hat pîrozkirin. Endamên Rêvebiriya xweser jî beşdarî pîrozbahiyê bûn. Li ser girîngiya şoreşa 19’ê Tîrmehê axaftin hatin kirin û hat diyar kirin ku şoreşa di aliyê wekhevî demokratîkbûnê de ji cîhanê re bû mînak.”
Zanîngeha Rojava bi minasebeta pîrozkirina 19’ê Tîrmehê roja destpêkirina Şoreşa Rojava şahiyek li dar xist.
Zanîngeha Rojava ya li bajarê Qamişlo bi minasebeta pîrozkirina 19’ê Tîrmehê roja destpêkirina Şoreşa Rojava şahiyek li dar xist. Şahî li salona Zanîngehê pêk hat. Rêveber, mamoste û xwendekarên zanîngehê jî tev li şahiyê bûn. Her wiha wek mêvan hevserokê Desteya Rêveberiya Xweser a Demokratîk Ebdulkerîm Saroxan, hevseroka Desteya Werzîşê ya Ciwanan Hemrîn Elî, hevserokê Meclisa Zagonsaz Hakem Xelo û koma muzîkê ya Erka Xweparastinê tev li şahiyê bûn.
Ebdulkerîm Saroxan li ser girîngiya rojê axivî û diyar ku dema ew xwe di nava xwendekarên Zanîngeha Rojava de ku berhemeke Şoreşa Rojava ye, dibînin, pir hestiyar dibin. Saroxan da zanîn ku Şoreşa Rojava bi xwe re gelek destkeftî anîn û wiha axivî: “Cudahiya vê şoreşê ji şoreşên din ew e ku şoreşên din xwe spartin destê xelkê, Şoreşa Rojava bi îradeya gel û bi hêza ciwanên gel bi pêş ket. Hiştin ku zarokên wan ji bo jiyaneke azad canê xwe bidin û vê şoreşê karibû di saziyên civakî de xwe bi rêxistin bike, mînaka wê jî saziyên perwerdeyê ne.”
Piştî axaftina Saroxan, Koma Çira şanoya bi navê “Rê” pêşkêş kir, piştî wê koma muzîkê ya Sazkar û herî dawî jî koma muzîkê ya Erka Xweparastinê xwendekar coşandin.
