Endamê Saziya Malbatên Şehîdan yê herêma Efrînê Ednan Şêx Mihemed da zanîn ku Rêber Ocalan bi pirojeya xwe ya azadiya gelan bû rêberê gelên azadîxwaz yên cîhanê û got, ji ber ku Rêber Apo gelên azadîxwaz temsîl dike bû armanca hêzên desthilatdar yên ku li ser xwîna gelan jiyan dikin.
Zana Roj/ Şehba
Derbarê salvegera 24’an ya Komploya Navneteweyî ya li dijî Rêber Abdullah Ocalan endamê Meclisa Saziya Malbatên Şehîdan ya herêma Efrînê Ednan Şêx Mihemed, ji rojnameya me re axivî.
Ednan diyar kir ku hêzên komploger bi riya Kompiloya Navneteweyî xwestin cîhanê ji fikrên azad û demokrasiyê qut bikin û wiha domand: “Di sedsala 21’an de vejîna raman û fikrên demokrasî yên ji bo azadiya gelan derket holê, ji bo têkbirina fikrên kapîtalîzmê û azadiya gelan, fîlozof û Rêberê Gelan yê serdemê Rêber Ocalan felsefeya azadiyê li cîhanê belav kir. Lê ji bo ku felsefeya wî nekeve xizmeta gelan de, hêzên desthilatdar li hember Komployekê ku dîrok li hember şerim bike, pêk anîn û Rêber Apo radestî dewleta Tirk a dagirker kirin.”
’Destê PDK’ê jî di Komployê de hebû’
Ednan anî ziman ku ji ber Rêber Ocalan neket bin xizmeta sîstemên navneteweyî yên desthilatdar de, hêzên navneteweyî bi hemû hêza xwe li hember raman û fikrên Rêbertî sekinînin û wiha domand: “Di dîrokê de gelek kesayetên kurd ji doza azadiya gelê Kurd derketin û têkoşîn kirin e. Piraniya wan jî, bi destên dijminên Kurdan û bi alîkariya hin kurdên xayîn hatin tesfiye kirin. Partiya Demokrata Kurdistan PDK’ê jî mînaka Kurdên xayîn e ku ji ber wê ji aliyê dijminê Kurdan ve tê qebûl kirin. Herwiha rola wê di Komploya Navneteweyî de jî hebû. Rêber Ocalan bi pirojeya xwe ya Netewa Demokratîk ne tenê doza azadiya Kurdistanê dide meşandin, ji bo tavahî gelên bindest bû riya azadiyê .”
’Tevgera Apoyî bi xwînê hatiye avdan, gav paşda avêtin ne pêkan e’
Endamê Saziya Malbatên Şehîdan Ednan Şêx Mihemed tekez kir ku tesfiyakirina Pergala Azadiyê wê ne pêkan be û axiftina xwe wiha bi dawî kir: “Armanca hêzên kompiloger ew e ku îdeolojî û xeta ku Rêber Ocalan ji me re daye diyarkirin, pûç bikin. Lê bi xabat û destkeftiyên ku hatine bidesxistin, tavahî cîhan û di serî de dijminên xeta azadiyê tekez kirin ku armanca Komploya Navnetewî vala hat derxistin. Em ê careke din ji cîhanê re tekez bikin ku riya azadiyê û Tevgera Apoyî bi xwînê hatiye avdan û gav paş ve avêtin ne pêkane.”
