Serokê OSP’ê Sînan Çiftyurek, daxuyaniya Serokê Rêveberiya Başûrê Kurdistanê Neçirvan Barzanî a derbarê Qendîlê de rexne kir û got: “Divê kurdên Başûr û kurdên li Tirkiyê li dijî vê yekê helwesta xwe nişan bidin. Çawa ku Efrîn û Şengal ya hemû kurdan e, Qendîl jî çiyayê hemû kurdan e.”
Têkildarî helwesta Rêveberên Başûrê Kurdistanê, Serokê Giştî yê Partiya Azadî û Sosyalizmê (OSP) Sînan Çîftyurek bertekên xwe anîn ziman.
Çiftyurek, xwest hemû partiyên kurdan li dijî êrîşên li dijî kurdan bibin yek û wiha got: “Koma Heşdi Şebî u Artêşa Iraqê êrîşi Kerkukê kirin. Divê hemû partiyên kurdan li dijî êrîşan bibin yek. Dive yekîtiya xwe ava bikin. Divê demokrasiya nava xwe xurt bikin. Divê meclîs çalak tev bigere û pirsgirekên aborî bi awayekî eşkere bi gel re bê parvekirin. Yekitiya Netewî ya Kurd girîng e. Divê partiyên kurdan li dijî dagirkirina Kerkuk, Efrîn û herêmên din yên kurdan bibin yek û yekîtiya neteweyî xurt bikin. Tirkiye, Iraq, Îran û Sûriye li djî kurdan dibin yek. Divê kurd jî di nava xwe de bibin yek.”
QENDÎL ÇIYAYÊ HEMÛ KURDAN E
Çîftyurek, anî ziman ku Tirkiye piştî operasyona li dijî Efrîn niha dixwaze li dijî Qendilê operasyonê pêk bine û wiha bi dawî kir: “Divê hemû partiyên kurdan li dijî polîtîkayên Tirkiyê dengê xwe bilind bikin. Daxuyaniyên Neçirvan Barzanî yên derbarê Qendîlê de nayê qebûlkirin. Hatina Barzanî ya Tirkiyê ne pirsgirêk in. Divê li Başûr û li Bakur siyaseta kurd li dijî van polîtîkayan helwesta neteweyî nîşan bide. Ger ku Kerkuk û Efrîn axa kurdan a hepar be Qendîl jî Çiyayê hemû kurdan e.”
Qendîl çiyayê hemû kurdan e
