Fermandariya Giştî ya YPJ’ê bi wesîleya salvegera Şoreşa Rojava ya 19’ê Tîrmeh’ê daxuyanî da û destnîşan kir ku şoreşa wan bûye çavkaniya azadiya hemû jinan. YPJ’ê wiha got, “Têkoşîna jinên Kurd bêguman xwedî kevneşopiyeke dîrokî ye. Jinan bi şoreşê re ne tenê ji aliyê leşkerî ve, di hemû aliyan de li hemû qadên jiyanê hêza xwe nîşanî tevahiya cîhanê dane. Ji ber vê yekê Şoreşa Rojava şoreşa jinê ye.”
Fermandariya Giştî ya YPJ’ê bi wesîleya salvegera Şoreşa Rojava ya 19’ê Tîrmeha 2012’an daxuyaniyeke nivîskî weşand û destnîşan kir ku şoreşa wan bûye çavkaniya azadiya hemû jinan.
Fermandariya Giştî ya Yekîneyên Parastina Jinê (YPJ) destnîşan kir ku Şoreşa Rojava şoreşa jinê ye.
Di daxuyaniya fermandariyê de hate gotin, “Şoreşa vejîna gelan û jinan a 19’ê Tîrmehê di serî de li Rêber APO, gelên Rojhilata Navîn, mirovahî û gelên Bakurê Sûriyê, tevahî şehîdên şoreşa azadiyê, şehîdên berxwedana serdemê, pîroz dikin.”
Fermandariya YPJ’ê diyar kir ku Şoreşa Rojava bi pêşengiya jinê dest pê kiriye û roj bi roj mezin bûye û wiha dewam kir: “Têkoşîna jinên Kurd bêguman xwedî kevneşopiyeke dîrokî ye. Têkoşîna jinên Kurd ku bi Besê, Zarîfe, Bêrîvan û Sarayan dest pê kir, bi Nalîn, Şervîn, Rêvan û Avestayan dewam kir.”
Di dewama daxuyaniyê de hate ragihandin ku Şoreşa Rojava bi beşdariya gel û jinên Kurd, Ereb, Suryanî, Tirkmen, jin û gelên ji baweriyên din mezintir bûye û ji bo hemû jinên cîhanê re bûye çavkaniya azadiyê.
Fermandariya YPJ’ê destnîşan kir ku jinan bi şoreşê re ne tenê ji aliyê leşkerî ve, ji aliyê siyasî, îdeolojîk û felsefî ve li hemû qadên jiyanê bi îradeya xwe ya azad cih digirin û hêza xwe nîşanî tevahiya cîhanê dane. Fermandariyê got, “Ji ber vê yekê Şoreşa Rojava şoreşa jinê ye.”
