Welatiyên Helebê ku piştî erdheja 6’ê Sibatê berê xwe dabûn herêma Şehabyê diyar kirrin ku tevî dorpêça hikumeta Şamê û kêmderfetan jî, Rêveberiya Xweser li herêma Şehbayê ew pêşwazî kirin û alîkariya wan kir.
Navenda Nûçeyan/ Şehba
Di 6’ê Sibatê de erdhejeke giran li Bakurê Kurdisatan û Sûriyê rû da û di encamê de bi hezaran mirovan jiyana xwe ji dest dan. Yek ji deverên erdhejê ku gelek ziyan lê çêbûn jî, bajarê Helebê bû. Rêveberiya Xweser ya herêma Şehbayê jî bi daxuyaniyekê ragehand ku ew amade ne welatiyên herêmên Sûriyê yên derdorê ku ziyan ji erdhejê dîtine, pêşwazî bikin. Piştî daxuyaniya Rêveberiya Xweser ya herêma Şehbayê, zêdeyî 2 hezar û 500 malbatan ji Helêbê berê xwe dan herêma Şehbayê. Tevî ku ev demeke dirêje herêma Şehbayê di bin ambargoya hikumeta Şamê de ye jî, lê herêma Şehba ji bo gelek malbatên Helebê bû stargeh. Ji bo pêşwazîkirina welatiyan jî, rêveberiya herêmê, komîn, meclis û şaredarî jî ketin navan tevgerê û li gorî derfetan alîkarî pêşkêş kirin.
Derbarê rewşa malbatên ku ji Helebê derbasî Şehbayê bûne, herwiha pêşwazîkirina Rêveberiya Xweser ya herêma Şehbayê ji wan re, welatiya bi navê Wehîde Hiso û welatiyê bi navê Ezet Birîm ku ji ber erdhejê ji Helebê hatine herêma Şehbayê, ji me re axivîn.
Dayîka bi navê Wehîde ku ji navçeya Bilbilê ya herêma Efrîn ye anî ziman
ku wan ji ber erdhejê gelek zerar dîtine û wiha got: “Ji ber bûyera erdhejê, gel gelek zirarên madî û manewî dîtin. Kêliyên ku mirov ji mala xwe derdikeve, kêliyên gelek dijwar in. Derketina me ji Efrînê piştî dagirkirina wê ji aliyê dewleta Tirk û çeteyên wê ve êşa herî mezin bû, lê niha carek din jî em wê êşê dibînin, sedem çi dibe bila bibe lê di encamê de terkandina cih û mala mirov, êşeke bê derman e.”
’Em êdî nikarin di xaniyên xwe de jiyan bikin’
Wehîde derbarê kêliya erdhejê de wiha got: “Mala me li taxa Şêxmaqsûd e û li tebeqeya sêyemîn e, dema erdhej çêbû tavahî gel derketin derve û ber bi bexçeyê Serokatiyê ve çûn. Ji ber ku ew devera herî bi ewle bû , bi hezaran gelê Helebê li wir kom bûn û li wir ji bo gel kon hatin vedan. Ji ber ku erdhejê ziyan gihandiye avahiya me û em nikarin careke din tê de bijîn. Dema me bihîst ku gel derbasî Şehbayê dibe, me jî yek carî berê xwe da herêma Şehbayê. Li Şehbayê tevî kêmderfetan jî komîn û meclis ji me re bûn alîkar.”
Welatiyê bi navê Ezet Birîm jî da xuyakirin ku di vê bûyerê de Hikumeta
Şamê qet bi her du taxên Helebê re nebû alîkar û wiha got: “Alikariya bûyerên wek erdhejê erkeke mirovahiyê ye, lê hikumeta Şamê ji bo herdû taxên Kurdan alîkarî pêşkêş nekir. Di her du taxan de gelek xanî hatine hilweşandin, her wiha mirî û birîndar jî hene, lê belê Hikumeta Şamê ambargoya li ser her du taxan didomîne.”
’Divê hikumeta Şamê ambargoyê rake’
Ezet di dawiya axaftina xwe de bang li Hikumeta Şamê kir ku dawî li ambargoyê li ser taxên Eşrefiyê û Şêxmesûd bîne û got: “Em derbasî herêma Şehbayê bûn, rêveberiya herêmê jî tevî kêmderfetan jî bi hemû hêza xwe bi gel re dibe alîkar û wan pêşwazî dike, di rewşa heyî de em banga hikumeta Şamê dikin ku ambargoya ku daye ferzkirin divê êdî were rakirin û ji erka wê ye ku ji zirarên hatine rûdan re, bibe alîkar ji ber ne tenê gelê Kurd li Helebê û Şehbayê jiyan dike, pêkhateyên Ereb û Turkmen jî hene”.
