Malbatên şehîdan ên Kobanê diyar kirin ku hêzên navneteweyî cekên kîmyewî didin dewleta Tirk a dagirker, di heman demê de li hember tecrîda li ser rêber Abdullah Ocalan bêdeng in.
Malbatên şehîdan bikaranîna çekên kîmyewî li dijî gerîla li Herêmên Parastinê yên Medyayê, şermezar kir.
ʹDema mijar dibe gelê Kurd her kes bê deng dibe’
Birayê şehîd Zekeriya û hevserokê Meclisa Malbatên Şehîdan a Herêma Firat Adil Hacî ji ajansa me re axivî û got: “Şerê li dijî gerîla li Herêmên Parastinê yên Medyayê, şerekî plankirî ye û gelek dewleta beşdarî vî şerî dibin û çekên kîmyewî didin dewleta Tirk. Ji ber vê yekê li hember bikaranîna çekên kîmyewî bê deng dimîne. Ji ber ku armanca yekane tunekirina berxwedana gerîla ye.”
Hacî destnîşan kir ku dema ku mijar dibe gelê Kurd her kes bê deng dimîne û ev li gotinên xwe zêde kir: “Her kes çavên xwe ji ber kiryarên zordestan digirin ku hewl didin me qir bikin. Ji ber wê dewleta Tirk a dagirker goristanên şehîdan vediguherîne navendên perwerdeyê. Li van goristanan, gorên bi hezaran şehîdan hene ku li şûna cîhanê canê xwe di oxira parastina mirovahiyê û tunekirina DAIŞ`ê de, feda kir.”
Hacî di dawiyê de bang li parêzvanên mafên mirovan kir ku li hember bikaranîna çekên kîmyewî li Herêmên Parastinê yên Medyayê û wêrankirina goristanên şehîdan li herêmên dagirkirin, erkên xwe bi cih bînin.
’Planaeke xetere ye’
Dayika şehîd Çiya û xwişka şehîd Îbrahîm, Emîne Yasîn got: “Hemwextî êrişên dewleta Tirk a dagirker ên li dijî Herêmên Parastinê yên Medyayê, civata navneteweyî bêdeng e. Ev bêdengî, nîşan dide ku ev êriş bi erêkirina hêzên navneteweyî têne kirin ku çekan didin Tirkiyê. Her wiha li hember tecrîda li ser rêber Abdullah Ocalan jî, bêdeng in. Ev hemû bi hev ve girêdayî ye. Planeke xetere li dijî me heye ji ber wê divê em baldar bin.” ANHA
