4 partî û hêzên siyasî bi daxuyaniyeke hevbeş civîna sêalî ya wezîrên parastinê yên dewleta Tirk, hikumeta Şamê û Rûsyayê wek komployeke li dijî gelê Sûriyê bi nav kir û rola Rûsyayê şermezar kir.
4 partî û hêzên siyasî li ser civîna sêalî ya di navbera wezîrên parastinê yên dewleta Tirk a dagirker, hikumeta Şamê û Rûsyayê de daxuyaniyek hevbeş da.
Di daxuyaniyê de hate bibîrxistin ku 28ʹê Kanûna 2022ʹyan wezîrê parastinê yê Tirk Hulusî Akar, wezîrê parastinê yê Rûsya Sergey Şoygu û wezîrê parastinê yê hikumeta Şamê Elî Mehmûd Ebas, tevî serokên saziyên îstîxbaratan ên her sê welatan li Moskovê civiyan.
Di daxuyaniyê de hate gotin: “Ev civîna biguman a ku encamên wê nehatin eşekirin, komployeke mezin li dijî gelê Sûriyê, hêvî û fedekariyên wê ne ku di nava 11 salên dawîn ji bo azadî û rûmetê dane. Dê encamên vê komployê li ser hemû xebatên bi armanca dîtina çareseriyeke siyasî ji aloziya Sûriyê re xetere bin.”
Di daxuyaniyê de hate diyarkirin ku rejîma Şamê û ya Tirkiyê sedemên dirêjkirin û kûrkirina aloziya Sûriyê ne û wiha hate domandin: “Ji ber vê yekê ev her du rejîm nabin sedemên çareseriyê ku gelê Sûriyê li bende wê ne. Her lihevkirin an jî peymanek di navbera herdu rejîmên navborî de nakevin xizmeta gelê Sûriyê û hêviyê wê. Lê belê dikevin xizmeta berjewendiyên herdu aliyan û siyasetên wan ên xirabker ên li herêmê.”
Partiyan di daxuyaniyê de destnîşan kir ku armanca sereke ya civînê ew e ku li ser têkbirina doza kurdî, projeya Rêveberiya Xweser û tunekirina QSDʹê ye li hev bikin û hate gotin: “Em her civîn a lihevkirineke ku çareseriyeke rasteqîn ji aloziya Sûriyê nebîne, red dikin. Em helwesta Rûsyayê şermezar dikin ku herdu alî anîn gel hev û rojekê ji bo dîtina çareseriyê hewldan nekiriye, berovajî vê beşdarî wêrankirina Sûriyê û koçberkirina gelê wê bûye.”
Di daxuyaniyê de bang li hemû hêzên nîştimanî yên demokrat û kesayetên welatparêz hate kirin ku li derdora rojeya MSDʹê kom bibin û li hemberî komployên ku şoreşa gelê Sûriyê, nirx û armancên wê dikin hedef, bisekinin.
Her wiha bang li hêz û partiyên siyasî yên kurdî hate kirin: “Nakokiyên xwe deynin aliyekî ji bo avakirina yekitiya neteweyî û xurkirina eniya hundirîn kar bikin da ku ji komployên ku li ser doza me têne kirin bibin bersiv.”
Di daxuyaniyê de hate gotin: “Çaresekirina aloziya Sûriyê ne bi lihevkirinên li ser rijandina xwîna gelê Sûriyê, lê belê bi diyalogên sûrî-sûrî yên cidî, pêkan e.”
Partî û hêzên ku daxuyanî dane ev in: Yekitiya Lîberal a Kurdistanê, Yekitiya Karkerên Kurdistanê (YKK), Partiya Aştiya Demokratîk a Kurdistanê û Partiya Rêkeftina Demokrat a Kurdî li Sûriyê.-ANHA
