Ciwanên Meclisa Malbatên Şehîdan a herêma Firatê bang li hikumeta Şamê kir ku yekser dorpêça li ser Şehbayê, taxên Şêxmeqsûd û Eşrefiyê bi dawî bike.
Têkildarî dorpêça tund a li dijî kantona Şehbayê, taxên Şêxmeqsûd û Eşrefiyê yên Helebê ji hêla hikumeta Şamê ve, Ciwanên Meclisa Malbatên Şehîdan a herêma Firatê axivîn.
Ciwanê bi navê Hecî Golagasî wiha got: “Rejîma Sûriyê careke din dorpêç li dijî taxên Şexmeqsûd û Eşrefiyê biriye û bû sedema krîzeke mirovî. Ev yek li dijî qanûnên mirovî ye. Ji ber îro bi sedan nexweş di nexweşxaneyan de bê derman in.”
Hecî Golagasî siyaseta ku hikumeta Şamê pêk tîne şermezar kir û wiha got: “Her tişt ji rejîma Sûriyê tê texmînkirin. Yê li hember êrişên dewleta Tirk a dagirker ên li dijî Bakur û Rojhilatê Sûriyê bê deng e, normal e gel ji derman qut bike.”
Li ser mijarê Rojîn Muslim ev tişt got: “Di navbera dewleta Tirk a dagirker û rejîma Sûriyê de têkildarî şerê li dijî gelê herêmê hevkariyek hye. Dewleta Tirk a dagirker bi hemû rêbazan gelê herêmê têk dibe, rejîma Sûriyê jî dorpêçek biriye; nahêle xurdemenî û derman derbasî taxên Şêxmeqsûd û Eşrefiyê û kantona Şehbayê bibin.”
Rojîn wiha domand: “Li şûna rejîm parastina gelê xwe bike û derman jê
re peyda bike, krîzeke mirovî pêk tîne û azarên nexweşan zêde dike.”
Ciwana bi navê Zên Ehmed jî ev tişt anî ziman: “Êdî her kes dizane kî parastina xaka Sûriyê, gel û erdnîgariya wê ji dagirkeriyê dike û kî dibe sedema pergendebûna wan. Careke din rejîma Sûriyê îsbat kir ku dev ji zîhniyeta xwe berneda û hewl dide bi rêya dorpêçê sûriyan pergende bike.”
Zên di dawiyê de bang li hikumeta Şamê kir ku yekser dorpêçê ji ser taxên dorpêçkirî bi dawî bike û wiha got: “Em Ciwanên Meclisa Malbatên Şehîdan, ji bo şikandona dorpêçê û piştgiriya gelê li Şehba, taxên Şêxmeqsûd û Eşrefiyê, amade ne her tiştî bikin.” ANHA
