Dibistan û ambara genim a gundê Um El Kêf ku di êrişa dewleta Tirk a dagirker de hilweşiyane, gundî tengezar kirin, zarok bê perwerde hiştin. Li pey êrişan nivîsa li ser texteyê dibistana hilweşiyayî maye: “Serkeftina rasteqîn serkeftina li hember nezanînê ye.”
FacebookTwitterWhatsAppTelegram
Li navçeya Til Temir a girêdayî kantona Hesekê cihên xizmetgûzarî û perwerdeyê yên ku hatine topbaran û bombebarankirin, rastiya êrişên dewleta Tirk a dagirker radixe ber çavan.
Yek ji van deveran gundê Um El Kêf ê dikeve rojavayê navçeyê ye.
Dîmenên dibistana gund û ambarên genim ên bûne hedefa êrişan bersiva pirsa “hedefa dewleta Tirk çi ye?” didin.
Dibistana gund ku bi dehan zarokan tê de perwerde didît wêran bûye û êdî nayê bikaranîn.
Dîwar hilweşiyane, rûniştek û alavên din ên dibistanê şikestine, polên perwerdeyê serobino bûne, pencere û derî li erdê ne.
Ji hilweşandinê tenê hevokek li ser texteyê perwerdeyê ku bala mirov dikişîne û difikirîne maye. Di nava resmên gulan de nivîsa “Serkeftina rasteqîn serkeftina li hember nezanînê ye” hatiye nivîsandin.
Amberên genim ên li gund jî ku berhemên gundiyan lê dihatin komkirin, bi temamî xirab bûne, hin guleyên topan ên neteqiyayî jî li nava ambaran mane.
Mal û dikanên gundiyan jî ji ber êrişan zirareke mezin dîtine.
Welatiyek ji pêkhateya Ereb ku ji niştecihên gund e dibêje ku di dema topbaranê de ew ji lingê xwe birîndar bûye.
Dayikek jî zarokên wê li dorê kom bûne û nan çêdike, dibêje ku ji ber tirsê xew bi çavên zarokan nakeve, hesreta wan jiyanek asayî ye.
ANHA