Rojbîn Zagros/Qamişlo
Li dijî êrişên dagîrkeriyê Jinên bajarê Qamişlo diyar kirin ku ewê heta dawiyê li kêleka hêzên leşkerî bin û li dijî dagirkeran berxedanê mezin bikin. Herwiha gotin, divê gelê herêmê bi hevre piştevaniya hêzên xwe bikin û sûcên dagirkeriya Tirkî eşkere bikin.
Êrîşên dagirkeriya Tirkî yên li dijî herêmên bakur û rojhilatê Sûriyê, herwiha kiryarên wê yên hovane yên li dijî welatiyên herêmê didomin. Hê jî planên Tirkiyê yên ku li dijî welatiyan herêmê daye destpêkirin bi dawî nebûne, ji qutkirina ava Firatê dest pê kir, heta ku xak dagîr kir û niha jî bi çekên giran, balafirên bê mirov û bi yên şer, welatiyên herêmê û binsaziya wê dike armanc.
Tevî ku êriş bi awayekî giran tê kirin, gel li ser xanî gundên xwe jiyana xwe berdewam dikin û bertekên gel li ser redkirina van êrîşên berdewam in. Herwiha gelê herêmê ji bo rûbirûbûna êrîşên dagirkeriyê amadekariyên baş dikin û bi vîn û hêza gelê şoreşgerî li kêleka hêzên leşkerî disekinin û banga xurtkirina têkoşînê dikin.
Derbarê êrişên dagîrkeriya Tirkiyê yên ser herêmên bakur û rojhilatê Sûriyê û pêkanîna kiryaran li dijî welatiyan, xirabkirina binsaziya herêmê û hedefkirtina navendên xizmetguzariyê, herwiha girîngiya xurtkirina têkoşînê li dijî dagîrkeriyê, jinên bajarê Qamişlo ji me re axivîn û gotin, Dewleta Tirk ya dagirker rûxandina xwe bi dagîrkirina Kurdistanê xilaske. Lê emê nehêlin ku ew xeyalên xwe yên li ser xaka me pêk bîne û êrişên wê yên dagirkirinê wê bibe dawiya wê.
Jina bi navê Emîne Salih têkildarî êrişên dawî yên ser herêmên bakur û rojhilatê Sûriyê wiha got: “Di van rojan de gelek herêmên bakur û rojhilatê Sûriyeyê ji aliyê balafirên şer yên dagîrkeriya Tirkî ve bi awayekî hovane û sîstematîk hatin bombebarankirin. Ev êriş bandorê hem li rewşa herêmê hem jî li aboriya wê dike. Lewra Tirkiyê ne welatiyan tenê, saziyên xizmetguzarî û yên girêdayî aboriya herêmê jî dike hedef. Bi vê yekê Tirkiyê hewl dide binsaziya herêmê têk bibe.”
`Tirkiyê polîtîkaya tinekirina gelên azadîxwaz dimeşîne`
Emîne di berdewamiya axaftina xwe de teqez kir ku dagirkeriya Tirk dijminê gelên azadîxwaz e û wiha pê da çû: “Dewleta Tirk polîtîkaya tinekirina gelên azadîxwaz û her kesê ku bi wan re doza azadiyê dike, dimeşîne. Tirkiye ne tenê li dijî gelê Kurd e, li dijî tevayiya gelê herêmê ye, ji ber ku Tirkiye li ser girên wêranî, şer û kuştina mirovahiyê hatiye avakirin û îro jî dixwaze xwe li ser giyanê şehîdên me û gelê me ji nû ve xwe ava bike.”
`Em gavekê jî paş ve navêjin û dev ji nirxên xwe bernadin`
Emîne da xuyakirin ku gef û êrişên dewleta tirkî ya dagîrker hêz û îradeya wan lawaz nakin û ev yek li axaftina xwe zêde kir: “Wek welatiyên bakur û rojhilatê Sûriyê, piştî lidarxistina şoreşê me bi hezaran şehîd dan û emê her li ser şopa wan bin, em gavekê jî paş ve navêjin û dev ji nirxên xwe bernadin. Xaka rojava xaka me ye, emê li ser xaka xwe bin û têkoşînê dewam bikin. Bi çi awayî be emê parastinê bikin û piştgiriya hêzên leşgerî bikin.”
`Emê berxwedanê mezin bikin`
Emîne Salih di dawiya axaftina xwe de bal kişand ser pêwîstiya yekitiya gelan û wiha got: “Ji bo bidestxistina maf û azadiya xwe ya rewa em ê bibin yek û li kêleka zarokên xwe yên canêxwe ji bo vê xakê feda kirîn, bin. Herwiha emê berxwedanê mezin bikin.”
‘Tirkiye di nava aloziyekê mezin de ye’
Lîna Edhem jî da zanîn ku armanca dewleta Tirkî ya dagîrker ji van êrişan ew e ku tevayiya hewildanên çareseriyê vala derxîne û axaftina xwe wiha domand: “Dagîrkeriya Tirkî di nav aloziyên pir giran de jiyan dike, ji bo ku xwe ji van aloziyan rizgar bike, tevayiya cûre û rêbazên hovane li ser me bi kar tîne. Dagirkeriya tirk hewl dide ku temenê kirîza Sûriyê dirêj bike, aramî û ewlehiya li herêmê têk bibe û Rêvebiriya Xweser vala derxe. Ji bo wê jî êrişî me dike. Lê hewldanên wê yên têkbirina sîstema Rêveberiya xweser û dagirkirina herêmê vala tên derxistin. Ev yek jî hebûn û hêza me diyar dike.”
`Hêza me baweriya me ye`
Lîna bal kişand ser rewşa awarte û got, ragihandina rewşa awarte di vê demê de pir girîng e. Ji ber ku Tirkiyê rojane êrişî herêmên me dike. Ji bo wê jî pêwîste em hertim ji vê rewşê re amade bin. Ji piçûkan heta mezinan divê em amade bin û xizmetê bikin. Divê gelê me li hember kiryarên Tirkiyê û siyaseta wê ya qirêj hişyar be û nekevin bin bandora şerê taybet. Hêza me baweriya me ye. Eger em hêza xwe xurttir bikin Tirkiyê nikare siyaseta xwe li ser me bimeşîne.
`Tirkiye zarokan bombebaran dike`
Lîna da xuyakirin ku ev kaxezên Tirkiyê yên dawî ne û wiha pê da çû: “Tirkiyê piştî ku li çiyayên Kurdistanê bi bin ket, bê çare maye û êdî nizane ka çawa dawî li kurdan bîne. Ji bo wê jî bi her awayî hewildanên xwe dike. Niha jî dixwaze tola binketina xwe bi êrişên ser gelê Kurd re rake. Ji bo wê jî balafirên xwe zêde kiriye û gelê herêmê dike armanc. Rojane gelê li herêmê bi taybet zarokan bombebaran dike. Ew dibêje ez ê herêmeke bi ewle li ser sînorê xwe ava bikim, lê mixabin li şûna ewlehiyê hovîtiyê bi kar tîne.
`Çawa ku me dawî li çeteyên DAIŞ`ê anî, emê dawî li dagîrkeriya tirkî jî bînin`
Lîna êrişên hewayî yên dewleta tirkî ya dagîrker yên li dijî gund û bajarên bakur û rojhilatê Sûriyê şermezar kir û got, ev êriş bûn sedema şehadeta gelek welatiyên herêmê bi taybetî zarokan. Dewleta Tirkan bi êrîşên xwe hewl dide ewleyî û aramiya li herêmê têk bibe û tirsê bixe nava gel. Lê gelê ku li beramberî çeteyên DAIŞ`ê û Çebhet El Nusra şer kiriye ti caran natirse û bin nakeve. Çawa ku me dawî li çeteyên DAIŞ`ê anî, emê dawî li dagîrkeriya tirkî jî bînin.
`Çiqas êriş hebin jî emê li beramberî wê hêza xwe xurttir bikin`
Edhem Lîna got, piştî ku şoreşa Rohilat dest pê kir êrişên ser jinê zêdetir bûn û axaftina xwe wiha bi dawî kir: “Dewleta tirkî ya dagîrker ji bo ku şoreşa rojava û rojhilat di şexsê jinê de bişkîne, êrişên xwe yên ser jinên kurd zêde kiriye. Lê em dibêjin; çiqas êriş hebin jî li beramberî wê emê hê zêdetir li ber xwe bidin û artêşa xwe xurttir bikin. Herwiha emê li ser asta Cîhanî jî xwe bi hêztir bikin.”
Lîna Edhem di dawiyê de got, çawa ku şoreşa rojavayê Kurdistanê bi navê jinên Kurd mezin û berfireh bû, em jî soza parastina destkeftî û nirxên şoreşê didin. Heta ku em çar parçeyên Kurdistanê azad nebînin emê li qadan bin û doza mafê xwe bikin. Kes ji ber kesekî din parastinê nake. Eger yek bixwe parastinê neke wê ji wateya mirovatiyê dûr bikeve û bibe koleyê kesên din.