Zozan CIZÎRÎ
Van demên dawî hukûmeta Erdogan a çete-faşîst ku êdî man û nemana wan li ser desthilata Tirkiyê di rojevê de ye, wekî her car ji bo vê carê jî temenê xwe yê li ser desthilatê dirêj bike, serî li hezar dek û dolaban dide. Erdoganê ji dema hatî ser desthilatê heya niha, rewşa gelên Tirkiyê aniye ber hilweşînê û di serî de Iraq, Sûriye, Ermenîstan û Yûnanîstan, bi siyaseta xwe ya şerxwaz û na-mirov hemû herêma Rojhilata Navîn aloz û tevlîhev kiriye, di vê siyaseta xwe ya tevlîhevkirinê de israr dike. Erdoganê tu qîmet û rûmeta xwe di meydana siyaseta welatên herêmê de nemaye, niha mecbûr e hewl bide hinek danûstandinên dîtbariyê xilas bike, pêş bixe. Lewre berî hefteyekê ragihandina ser bi Erdogan a Ajansa Anadolu ku ji ber alîgiriya xwe ya desthilatê ew jî tu îtibara xwe ya ragihandinî nemaye, ji bo deriyê hevdîtina Beşar Esad a li gel Erdogan veke, bi rojan di manşetên xwe de nûçeyên ku digotin, “Erdogan gotiye, ez dikarim bi Esad re hevdîtin bikim, di siyasetê de xeyidîn nabe” û hwd. belav kirin.
Dema ev nûçe dihatin belavkirin, hewayek wisa ava bibû ku, heçku Esad amade ye bi Erdogan re hevdîtin bike, heta hindik maye lihev bên, lê belê roja 2’ê Kanûnê nûçeyek wekî bombeyê kete rojeva cîhanê ku, Erdoganê dîktator hejand. Ango hinek çavkaniyên nêzî Esad agahî dane ajansa Reûtersê û eşkere kirin ku, serokê Sûriyê Beşar Esad naxwaze bi Erdogan re hevdîtin bike. Ev wekî şeqamekê li nav çavê Erdogan ket! Çavkaniyekê ji bo vê digot, “Çima zaferekê diyarî Erdogan bike!? Beriya hilbijartinê Esad nêzî Erdogan nabe.” Dîplomatekî jî digot, “Sûriye, heya gavek berçav çênebe, hevdîtina li gel Erdogan bêwate dibîne û wekî gava berçav, ew dixwazin leşkerên Tirk ji welatê Sûriyê derkevin.” Di vir de eşkere dibe ku, serokê Sûriyê Beşar Esad jî fêm kiriye Erdogan wekî hukûmeteke fişkilî, ne ji bo pêşketina Sûriyê, ji bo Sûriyê jî bike pêlîstika desthilata xwe li riyeke hevdîtinê digere. Bi vî awayî deriyê hêviya ku li ser hevdîtineke bi Esad re hinek dengan ji xwe re kom bike, li Erdogan hat girtin.
Di vê rewşê de divê em li pêş bibînin ku, Erdoganê dîktator ê ji siyaseta xwe ya nermik-xapînok encam negirtî, vê carê wê casûs û çeteyên xwe yên DAÎŞ-ENKS’î yên her carê bi nav û cilûbergên cuda li nav giştî Sûriyê û axên Bakur-Rojhilatê Sûriyê bi cih kirî, gur bike, bixe nav liv û tevgerê. Ji bo wê dibe ku rojên bi şer û xwînrêj li pêş gelên Sûriyê be. Encex vê carê Erdogan çi bike, serî li çiqas rê û rêbazên qirêj bide jî, wekî di mijara hevdîtina li gel Beşar Esad de eşkere bû, wê encam ji bo wî her têkçûn be. Jixwe gelên Bakur-Rojhilatê Sûriyê yên bi fikra Neteweya Demokratîk xwe birêxistin kirine, ji destpêkê ve xwe ji pençên Erdogan rizgar kirine. Îro bombeyên ku dewleta Tirk li ser xelkên me yên Bakur-Rojhilatê Sûriyê dibarîne, berî her tiştî ji ber vê herêmê xwe nekir pêlîstika desthilata Erdogan e. Lewre watedar e. Ev nîşana sekna birûmet a gelên Bakur-Rojhilatê Sûriyê ye. Erê di vê riyê de em berdêlên giranbuha didin, roj nîn e em bi xebera windahiyekê şiyar nebin û dilê me jan neke, lê helbet azadî û serfirazî jî bê berdêl nabe.
Di vê rewşê de divê mirov bibêje, wey li halê wan çeteyên DAÎŞ’î, OSO’yî û ENKS’î ku bi benê Erdoganê dîktator daketin bîrê! Çawa ku pêşeroja Erdogan nîn e, pêşeroja van çeteyan jî ji derveyî riswabûn û windakirinê wê tiştek nebe.
