SOZDAR DEMÎR
Êrişên Tirkiyê wê yekser bandorê li têkoşîna li hember DAIŞ’ê bike û dike jî. Tevî vê xeteriyê hêzên qaşo garantor, derveyî çend daxuyaniyên şermok ti gav neavîtine. Pirs di vir deye gelo ev hêz careke din dixwazin DAIŞ zindî bibe?
Êrişên dewleta Tirk a dagirker ên li ser herêmên Bakur û Rojhilatê Sûriyê bê navber dewam dikin, Tirkiye her ku di cihekê de tengav dibe berê xwe dide Rojavayê Kurdistanê û ne dibêje ev kale an zaroke, hema bi hovane êrişê herkesê û her cihî dike. Artêşa Tirk heta niha cihên ku kirine hedef cihên mazot, xaz, petrol, genim û mal û milkên welatiyane, ango cihên pêwîstiyên jiyanî ne. Armanca dewleta Tirk ji van êrişan ew e ku, gel birçî bihêle û bide koçberkirin da ku demografiya herêmê biguhere û xelkên biyanî bîne li cihên gel ên resen bi cih bike.
Îro ev herêm bi çekên herî pêşketî rastî êrişan tê û dewletên dunyayên yên weke Rûsya û Dewletên Yekbûyê yên Amerîka çavên xwe ji van êrişan re digrin. Mane duh bû ku çeteyên DAÎŞ’ê li cîhanê zindî bûyîn û tevî van çekên pêşketî û ev derfetên ku di destê van dewletan de heyî jî, nekarin dawî li terora DAÎŞ’ê bîne. Lê belê keç û xortên vî welatî bûn ku singên xwe kirin mertal li beranberî terora DAÎŞ’ê û cîhan ji vê terora hov parast. Di nava vê berxwedanê de nêzî 13 hezar zarokên vî gelî şehîd ketin û zêdetirî 24 hezar kes jî gazî û birîndar bûn.
Îro ev gelê ku cihan ji terorê xilaskirin, dibin êrişeke giran a dewleta Tirk deye. Lê li beranberî van êrişan şuna ku garantorên li herêmê piştgiriya gel, hêzên parastinê û QSD’ê bikin, xwe li bêdengiyê danîne. Dewleta Tirk ya dagirker jî bi van çekên wan, xelkê Bakur û Rojhilatê Sûriyê dikuje; mal û milkên xelkê herêmê wêran dike. Herwiha ev êriş dibin sedem ku çeteyên DAÎŞ’ê birevin û dîsa hêza xwe li ser hev kom bikin ku cardin êrişî herêmê û cîhanê bikin.
Heger ku DAÎŞ dîsa zindî bibe wê ev xeterî ne li ser herêmên Bakur û Rojhilatê Sûriyê bi tenê be, wê Cîhan tev de ji vê terorê zirarê bibîne di serîde Rûsya û Amerîka. Ger ku pêşîlêgirtinek li hemberî van êrişên Tirkiyê neyê girtin, wê demê wê êriş li ser girtîgehên çeteyên DAÎŞ’ê û kampa Holê çêbibe û di ber van êrişan re jî wê çete ji kampa Holê û ji girtîgehan birevin. Tirkiye wê van çeteyan li gorî berjewendiyên bi kar bîne. Ji xwe herî dawî fermandarê giştî yê QSD’ê jî di hevpeyvîna xwe ya dawî de teqezkir ku, wan ji ber êrişên dewleta Tirk a dagirker operasyonên xwe yên li dijî DAIŞ’ê rawestandin e. Her wiha diyakir ku eger şerek rû bide, wê ev kamp û girtîgehên çeteyên DAIŞ’ê ne di bin berpirsyariya wan de be. Ev daxuyanî jî piştrastdike ku bandora êrişên Tirkiyê wê yekser bandorê li têkoşîna li hember DAIŞ’ê bike û dike jî. Tevî vê xeteriyê hêzên qaşo garantor, derveyî çend daxuyaniyên şermok ti gav neavîtine. Pirs di vir deye gelo ev hêz careke din dixwazin DAIŞ zindî bibe?