Komîteya Navendî ya PKK’ê bi wesîleya salvegera 44’emîn a avakirina PKK’ê banga mezinkirina berxwedana azadiyê ya li hemû qadan kir û got, em bang li hemû gelê xwe û dostên xwe dikin ku li dora berxwedana gerîla bibin yek.
Bi wesîleya 27’ê Mijdarê salvegera 44’emîn ya avbûna Pariya Kerkerên Kurdistan PKK, Komîteya Navendî ya PKK’ê daxuyaniyeke nivîskî weşand.
PKK’ê di daxuyaniya xwe 27’ê Mijdarê Vejîna Neteweyî û Cejna Partiyê li Rêber Apo li hemû hevrêyan, li gelê xwe yê welatparêz û dostên xwe yên demokrat pîroz kir û got: “Em hemû şehîdên xwe yên leheng ên ku bi şoreşgerê mezin ê enternasyonalîst rêheval Hakî Karer dest pê kir û heta şehîdên berxwedana Zap, Avaşîn û Metînayê em hemû şehîdên xwe, bi rêzdarî, hezkirin û minetdarî bi bîr tînin. Em soza xwe dubare dikin ku em ê bigihîjin armancên wan û bîranînên wan zindî bihêlin. Em ji hemû kesên ku di salvegera 45’emîn PKK’ê de ji bo azadî û demokrasiyê têdikoşin re, serkeftinê dixwazin”.
’Navê PKK’ê bûye hevwateya Kurdayetî û Kurdistanê’
PKK’ê da xuyakirin ku PKK Partiya Rêbertî û şehîdan e û wiha got: “44 sal in di dîroka mirovahiyê de yek ji têkoşîna azadiyê ya herî mezin û bi wate daye meşandin. Li dijî dewleta Tirk a faşîst, mêtinger û qirker û pergala modernîteya kapîtalîst a cîhanî, vejîn û jinûvezayîna gelê Kurd pêk anî. Bi têkoşîna azadiyê ya pîroz a ku bi pêşengiya Rêber Apo û li ser bingeha hêza gelê me li ser xeta fedaîbûnê de pêş xistiye feraset û pergala mêtinger û qirker şikandiye. Her kêlî, roj, meh û sal bi têkoşînek ji ya berê dijwartir û serkeftîtir rêya rizgariya hemû gelan û bindestan bi taybetî jin û ciwanan ronî kiriye.
’Berxwedana mezin a gerîla mohra xwe li sala 44’an da’
PKK da zanîn ku têkoşîna sala 44’an a PKK’ê di heman demê de bû saleke têkoşînê ya ku salên berê derbas kir û layiqî rûmeta berxwedanê ya PKK’ê ye û wiha dewam kir: “Eşkere ye ku berxwedana mezin a gerîla ya li ser esasê Berxwedana Îmraliyê ya dîrokî û berxwedanên Zap, Avaşîn û Metînayê mohra xwe li sala 44’an da. Gelê me û dostên me yên welatparêz, li dora Rêber Apo û hêzên me yên leheng ên gerîla bûne yek, li dijî êrişên hovane yên faşîzma AKP-MHP’ê ya ku bi hemû rêbaz û alavan êrişan dike, li ser armanca azadiya fîzîkî ya Rêber Apo têkoşîneke lehengî dane meşandin. Ev berxwedana dîrokî ya ku têkoşîna me ya azadiyê ya 44 salan biriye asta jor, bi şikandina êrişên dagirkeriyê yên AKP-MHP’ê û têkbirina planên wan ên îmhayê, derfet û firsendên bidestxistina serkeftinên mezintir radestî sala têkoşîna xwe ya 45’an dike.”
’Gerîlayên HPG û YJA-Star li Zap, Avaşîn û Metîna destanên lehengiyê nivîsandin’
PKK diyar kir ku wê di sala 45’emîn de serkeftinên herî watedar bên bidest xistin û wiha domand: “Bêguman gerîlayên HPG û YJA-Star ku li Zap, Avaşîn û Metîna destanên lehengiyê nivîsandin, wê têkoşîneke wiha bi rê ve bibin. Yên ku 6 salan li Herêmên Parastinê yên Medyayê û 7 mehan jî li Zap, Avaşîn û Metîna dibêjin ‘Em rê nadin dagirkeriyê’ wê karibin têkoşîna ku dagirkeran bişkînin, pêk bînin. Zap, Avaşîn û Metîna wê bibe cihê ku dilê gelê me û mirovayetiya azad li wir lê dide. Feraset û siyaseta faşîst û qirker wê li Zap, Avaşîn û Metîna bê hilweşandin, çerxa azadiyê ya dîrokê li vê qadê wê bigere. Li ser vê bingehê em careke din berxwedana gerîla ya leheng silav dikin û bang li hemû gelê xwe û dostên xwe dikin ku li dora berxwedana gerîla bibin yek”
PKK da zanîn ku Jinên li çar aliyê cîhanê bi taybetî jinên Kurd bi rojan e li ber xwe didin û dadikevin qadan û tundiya dewleta mêr protesto dikin û wiha got: “Weke li Rojhilatê Kurdistanê û Îranê, li çar aliyên cîhanê jin bi dirûşma ‘Jin Jîyan Azadî’ ber bi azadiyê ve dimeşin. Em PKK em van çalakiyên azadiyê yên li dijî zîhniyet û siyaseta serdest a mêr silav dikin. Em di wê baweriyê de ne ku çalakiyên azadiyê yên jinan roj bi roj mezintir dibin û dibin şoreşa azadiya jinê û sedsala 21’ê dikin sedsala jinan. Partiya me ku bi fikra Rêber Apo ya jineolojiyê ve girêdayî ye, her tim ji hemû rêhevalên jin ên ji bo azadiyê têdikoşin re serketinên mezin dixwazin”.
’Wê sala 45’an a PKK’ê bibe sala serkeftineke mezin’
PKK da xuyakirin ku eşkere ye ku sala 45’emîn a PKK’ê saleke pir krîtîk e û karibe qederê diyar bike û wiha got: “Faşîzma AKP-MHP’ê ji bo desthilatdariyê, dewleta Tirk jî ji bo bijî bi hemû hêza xwe êrişan dike û wê hê zêdetir êrişan bike. Li hemberî van hemû êrişan gelê me û dostên me wê di bin pêşengiya partiya me de zêdetir bibin yek û berxwedana herî mezin a dîroka xwe pêş bixin. Hêzên me yên leheng ên gerîla, rêxistinên jin û ciwanan, gelê me yê li çar parçeyên Kurdistanê û derveyî welat, wê sala 45’an a PKK’ê bikin sala serkeftineke mezin û bikin sala azadiya fîzîkî ya Rêber Apo”.