Volqan Elî
Êdî ji aliyê her kesî ve baş tê zanîn ku ‘Rûdaw’ çi ye, çi karî dike û kê ava kiriye. Ne ku nayê zanîn.
Ji beriya dehan sal MİT’a Tirk belgeyeke pir veşartî dişîne balyozxaneyên xwe yên li Başur. Dibêje “Pêwîst ê li herêmê televziyonek were vekirin. Lê bi zimanê herêmê biaxive. Armanc bike ku ‘Tevgera Azadiyê’ bê bandor bike, reş bike”.
Dagirkeriya Tirk li ser vî esasî noker û hevkarên xayin ên li Başûr dixe tevgerê. Bi vê armancê çend qanalên televziyonê, radyo û rojname dest bi weşanê dikin. Îro jî ev amûr wekî destê rastê yê dijminê dagirker ê li Başûr kar dikin. Ji ber ku zimanê ku pê diaxivin Kurdî ye, jixwe keseke/î destpêkê guhdar bike fêm nake ku bi çi mejiyî tevdigerin.
Lê însanekî Kurd ê kêmekê dilê wî/ê li ser welatê wî/ê be, bêyî ku pir polîtîk û siyasî bifikire û hewce bibîne ku pir analîz û dahûrandinan bixwîne, dikare gelek tiştan fêm bike. Me gotibû ev şirîketa ‘Rûdawê’ ji aliyê MİT’ê ve hatiye avakirin… ev derbirîn û gotin hema ne belasebeb e. Delîlên wê yên cuda jî hene. Di malpêra înternêtê ya 14.04.2024 vê şirîketa (Rûdaw) de nûçeyeke ji rêzê hebû. Jixwe em dibêjin ‘ji rêzê’ bû. Bi rastî jî li gorî xeta weşanê ya ‘Rûdawê’ ev nûçê pir zêde ji rêzê ye. Çawa ku mirovek nan dixwe, avê vedixwe û bêhn dide û distîne ji rêzê be; Li gorî ‘Rûdawê’ jî ev nûçe, hema nûçeyeke ji rêzê bû.
Bi kurtasî nûçe wisa ye: Dibêje, “Selçûk Bayraktar tevî çend fermandrên artêşa Tirk hatiye li çiyayê Metîna û cejna remazanê ya leşkerên Tirk pîroz kiriye. Piştî wê jî vegeriye baregehên artêşa Tirk ên li Şirnexê”.
Nabêje ev Selçûk Bayraktar kî ye; nabêje ev Metîna çi çiya ye; nabêje li ser van xakên pîroz çend pêşmergeyan bi xeyala welatekî azad canê xwe feda kirine; nabêje bi wan balafirên şirîketa Selçûk Bayraktar çêkirine çend gerîla li ser vî çiyayê pîroz şehîd bûne. Lê divê mirov heqê wan jî nexwe! Hin tişt ji bîr nekirine!
Di heman nûçeyê de çend wêne bi cih kirine. Ev ji bîr nekirine! Na, ne wêneyên pêşmergeyên qedîm e! Ma tê bîra kê, pêşmerge be jî nayê bîra wan. Ne merhûmê Mele Mistefa ye jî. Ji van wêneyan yek, ala komara dagirker a Tirk e. Cihê wê wisa xweşik çêkirine, erda wê xweş kirine û ala dewleta dagirker a bi heyv û stêrk pê ve kirine. Wêneyek jî Selçûk Bayraktar, leşker û generalên Tirkên dagirker û dibe ku çendek jî PDK’yî bin. Vaye ev der çiyayê Metîna ye! wêneyên din jî dîsa bi îhtîmaleke mezin baregeheke hêzên dagirker a li Metîna ye yan jî nêzîk wan deran e. Dibe ku şerê taybet be, ji ber wê yekê em tiştekî misoger nabêjin. Lê ev dîmen li ku derê be jî sembolek e; peyameke wê heye. Ya girîng ev e.
Ev nûçe, ev wêne çi be, yan jî dîmenên kuderê bin jî ma xwediyên vê ‘Rûdawê’ nizanin çiyayê Metîna, warekî qedîm ê berxwedana Kurdan e. Bi hezaran gerîla û pêşmerge, bi xeyalên azadî û serxwebûnê, li ser singa wê şehîd bûne.
Ez bi xwe ne dîroknas im. Lê dengê ji nava dîrokê tê, yanî navê ‘Metîna’ bi xwe di cih de wê şaristaniya qedîm a Mîtanniyan tîne bîra mirov. Ma ne diyar e ‘Metîna çi qas jî dişibe peyva Mîtanî. Di ser re herî kêm du-sê hezar sal derbas bûye, ‘î’ya destpêkê bûye ‘e’, ‘a’ bûye ‘î’ û ‘î’ya dawî jî bûye ‘a’. Nizanim, min dîrok lêkolîn nekiriye dibe ku di dîrokê de tiştekî wisa hebe jî. Eger tinebe ev texmîn ji rastiyê pir ne dûr e. Yên bê kok ji xwe re bila bihizrin! Lê ew carekê bi nexweşiya ‘sendroma Stokolmê’ ketine, nefikirin jî dibe. Bila bi pey nexweşiya xwe bikevin; ji bo wan baştir e.
Na! Ew karê xwe dikin! Em, wan, wê hişmendiya Rûdawê, kevneşopiya xiyanetê ti car şermezar nakin! Gotineke gelê Tirk heye; ev gotin jî bi îhtimaleke mezin a Tirkmenên ku li dijî Osmaniyan şer kirine. Dibêje, “Yekî ku nanê kafiran bixwe, dê şûrê wan bikişîne”.
Ma xwediyê wan kî ne? Ji beriya ku Tirk ji Asyaya Navîn werin, ma ne kafir bûn? Wekî ku dengek bêje, ma ne Erdogan, Bahçeli û Selçûk Bayraktar Misilman e! Eger Misilman bin, jixwe cejna xwe pîroz kirin û îhtimalek e, rojî girtin wê demê dê biçin cinetê. Gelo Xweda dê wan bixe bihuşta xwe!