Darîn Silê/Tebqa
Ji bo bidestxistina dermanên kêmpeyda û pêkanîna pêdiviyên welatiyên li herêmên Bakur û Rojhilatê Sûriyê ji dermanan, herwiha kêmkirina bihayê dermanan, vê dawiyê li Tebqayê kargeheke çêkirina dermana hat vekirin.
Bi armanca peydakirina dermanan ji bo herêmên bakur û rojhilatê Sûriyê, kontrolkirina bihayên wê û bidestxistina qaseyeke baş ji derman, Welatiyrkî bajarê Tebqayê di heyva çûyî de kargeha çêkirina dermanên avî ya bi navê `Laght Farma` li gundê El Widyan yê bajarê Tebqayê vekir. Kargeh niha dermanên avî çêdike û dê di demên pêş de heban jî çêke.
Ji ber ku ev kargeh dê xizmeta welatiyan bakur û rojhilatê Sûriyê bike û hewcedariya welatiyan ji dermanan pêk bîne, Rêveberiya Xweser jî jê re bû alîkar û mazot ji kargehê re peyda dike.
Demeke dirêje herêmên bakur û rojhilatê Sûriyê dorpêçkirî ne, ev dorpêç jî bû sedema gelek aloziyan. Yek jê aloziya dermana ye, ku derman edî peyda nabin û bi bihayekî bilind tên firotin. Ji bo wê jî projeya vekirina kargeheke dermanan di dema niha de pir baş û bi sûde. Heriwha ev kargeha duyemîn li ser asta bakur û rojhilatê Sûriyê ye.
Derbarê armanca vekirina kargehê û xebata wê de Rêveberê kargehê Eymen Hemadî ji me re axivî û da zanîn ku armanca sereke ya vekirina kargehê peydekirina dermanan li herêmên bakur û rojhilatê Sûriyê ye. Heriwha got, Dr Ehmed Heyawî di vekirina kargehê de bi min re alîkar bû.
Dermanên ku li kargehê tên amadekirin
Eymen têkildarî madeyên dermanan yên ku di kargehê de têne çêkirin wiha got: Niha di kargehê de dermanên avî yên weke kêmkirina tayê, serma, serêş, kuxikê, verşiyê, û hinavê tên amadekirin.
`Armanc peydekirina dermanan li herêmê ye`
Eymen got, armanca me ji vekirina kargehê ew e ku derman li herêmê were peydekirin. Lewra piştî girtina deriyên bi ser Bakur û Rojhilatê Sûriyê derman li herêmên me nayê peydekirin û pir biha bûye. Ji bo wê jî me xwest em vê ykê bi riya vekirina kargehekê çareser bikin û aboriya herêmê bi pêş bixin. Niha jî em hewl didin derman bi bihayeke guncaw û kêmî cihên li derve, pêşkêşî gelê xwe bikin.
Eymen diyar kir ku bihayê dermanên ku ji aliyê kargehê ve têne çêkirin li gorî bihayên ku Wezareta Tenduristiyê di hikûmeta Şamê de destnîşan kiriye, têne firotin. Herwiha got, rojane kargeh 15 hezar qutiyên dernmanên avî çêdike û piraniya wan jî ji çavkaniyeke Hindî, hin jê jî çînî û ewropî ne.
`Bi hejmareke pispor û dermanfiroşan xebat tê kirin` 
Eymen da xuyakirin ku kargeh ji aliyê hin pispor û dermanfiroşan ve tê kontrokirin û axaftina xwe wiha domand: “kesên ku kargehê kontrol dikin tev pisporin û xwedî tecrubeya dirêj di kargehên dermansaziyê yên li Helebê de bi dest xistine. Pisporan bi hejmarek dermansazan xebateke baş li kargehê didin kirin. Herwiha hejmarek dermansaz weke delegeyên zanistî li wê derman li herêmên bakur û rojhilatê Sûriyê belav bikin.”
Eymen anî ziman ku hejmara karkerên di nava kargehê de 25 karker û karmend in, ku tecrûbeya wan di xebata kargehên dermanan de heye. herwiha got, kargeh ji saet heştê Sibehê heta çarê êvarê xebatê dike.
`Awayê amadekirina dermanan`
Eymen behsa awayê amadekirina dermanan kir û got, beşeke teybet ji bo amadekirina dermana heye tê de du xezanên amadekirina dermanên avî heye, xezanê amadekirinê û xezanê komkirinê. Destpêkê derman di xezanê amadekirinê tê amadekirin û dikeve alaveke dagirtinê, piştre derbasî alava leziqandin û pêçandinê dibe û dikeve hucreyê heta tê analîzekirin û di dawiyê de dikeve depoyan.
`Kargeh pêdiviya tevayiya herêmên bakur û rojhilatê Sûriyê peyda dike`
Eymen da zanîn ku berhemê kargehê li herêmên bakur û rojhilatê Sûriyê tê belavkirin û wiha pê da çû: “Kargeh pêdiviya tevayiya herêmên bakur û rojhilatê Sûriyê peyda dike. Wekîlên kargehê yên belavkirinê li Minbic, Reqa, Tebqa, Dêrazor, Hesekê û Qamişloyê hene. ev wekîl dê derman bighînin van bajaran.”
Rêveberê kargehê Eymen Hemada di dawiya axaftina xwe de got, Rêveberiya Xweser sotemeniyê bi nirxê kêm dide kargehê û planên me yên berfirehkirin û pêşxistina kargehê hene, ku ew jî avakirina xeta kapsulan bi xeteke hebên e, ew jî di nava salekê de wê were çekirin.