Navenda Nûçeyan
Roja 18’ê Îlonê dibistanên Bakur û Rojhilatê Sûriyê deriyên xwe li pêş xwendekaran vekirin ku dest bi sala nû ya xwendinê (2022-2023) bikin.
18’ê Îlonê Roja yekemîn a dewama dibistanên li Bakur û Rojhilatê Sûriyê û taxên Şêxmeqsûd û Eşrefiyê yên Helebê dest pê kir. Ligel wê jî li ser paşxistina dema destpêkirina sala xwendinê li herêma Firatê ji ber topbarana dewleta Tirk a dagirker, metirsî hene.
Sala Xwendinê 30`ê Tebaxê, Dewama Xwendevana 18`ê Îlonê destpê kir
Desteya Perwerdeyê ya Rêveberiya Xweser a Bakur û Rojhilatê Sûriyê di 30’yê Tebaxê de destpêkirina sala xwendinê ya 2022-2023’yan ragihandibû û eşkere kiribû ku 11’ê Îlonê roja yekemîn a dewama îdarî ye û 18’ê Îlonê jî roja yekemîn a dewama xwendekaran e.
Li gorî daneyên Desteya Perwerde û Fêrkirinê, 4 hezar û 700 dibistan li Bakur û Rojhilatê Sûriyê amade ne ku pêşwaziya 878 hezar xwendekarên qonaxên seretayî, navîn û amadehî bikin.
Her wiha 61 hezar mamoste ji bo perwerdeyê di dewreyên perwerdeya havînê re yên li ser meteryal û rêbazên danûstandina bi xwendekaran re derbas bûn.
Xwendekar bi 3 zimanan perwerdeyê dibînin; erebî, kurdî û suryanî. Lê îsal waneyên êzdayetî û îslamê derbasî dibistanan bûn. Hemwextî wê amadekirina waneyên ola xiristiyantiyê jî tê kirin.
Tevî mercên zehmet amadekariyên vekirina dibistanan hatin temam kirin
Bi destpêkirina sala xwendinê desteya Perwerde û Fêrkirinê ya Herêma Cizîrê pêwîstiyên dibistanê li 6 hezar xwendekarên kampên koçberên Serêkaniyê yên li bajarê Hesekê belav kirin.
Hevseroka Desteya Perwerde û Fêrkirinê ya Herêma Cizîrê Rohat Xelîl çavdêriya xebatên belavkirinê kir. Pêwîstiyên ku hatine belavkirin jî ji pênûs, lênûs û rengan pêk dihat.
Tevî mercên zehmet û êrişên dewleta Tirk a dagirker û rewşa awarte ya ku Rêveberiya Xweser ragihandiye, lê proseya perwerdeyê dewam dike.
‘5 hezar û 596 xwendekar ji ber êriş û topbarana dewleta tirk ji xwandinê bêpar in’
Hejayî gotinêye ku li navçeyên Til Temir û Zirganê 3 hezar û 596 xwendekar ji xwendinê mehrûm in. Li navçeya Eyn Îsayê û gundewarên Girê Spî jî 2 hezar xwendekar ji perwerdeyê bêpar in. Li navçeya Şêrwayê 3 hezar xwendekar li 14 dibistanan tên belavkirin hema bêje ji xwendinê bêpar in. Ev xwendekar ji ber top û moşekên dagirkeriya Tirk û çeteyên wê li ser gund û dibistanan ji xwendinê bêpar in.
Çavkanî ANHA